آيات أباظة تكشف كواليس معركتها مع الورم الخبيث: خبيت الخبر سنة وعمرو عانى معي

تحدثت الإعلامية آيات أباظة عن تفاصيل إصابتها بورم خبيث، وكواليس مواجهتها المرض عامين وسط دعم كبير من عائلتها وعائلة زوجها السيناريست عمرو محمود ياسين.

قالت آيات أباظة عبر تصريحات تلفزيونية: «خبيت خبر إصابتي بالورم لمدة سنة، ومعرفش الخبر اتعرف إزاي وبدأت ألاقي الموضوع ينتشر من بعد العملية، وكنا سايبين كل حاجة على ربنا ومن كتر ما الموضوع كان كبير أوي مكنش في وقت نمسك الموبايل نكتب حاجة».

وتابعت: «وبعد فترة طويلة عمرو كان بيبقى محتاج أن الناس تدعيلي، وكنت بفرح أوي لما ألاقي الناس تدعيلي وبقول مش معقول الناس دي كلها بتدعيلي ومخفش، أنا بقالي في الموضوع ده سنتين وبجد الناس حاجة جميلة أوي وعمرو عرف بإصابتي قبلي، وأنا مش عارفة ده كان جهل ولا ربنا نزل عليا أني مستوعبش، التحاليل بتاعتي ظهر فيها جرثومة معدة، فأنا كنت فاكرة أن المسح الذري ده علشانها وكنت رايحة أعمله ودخل دكتور ميعرفنيش وبيقولي بدأتي كيماوي ولا لسه؟».

واستكملت آيات أباظة: «فقولتله أنا عندي جرثومة معدة، وأول ما عمرو برق له اتوترت، ولما النتيجة طلعت قالي عندك لحمية بدل ما يقولي إنه ورم وأنا صدقته واللي حصل كان كابوس يارب ما حد يعيشه، أنا قعدت 12 ساعة في أوضة العمليات والدكتور قال دي من أكبر العمليات اللي عملتها، وكان لازم في النص ياخد رأي عمرو في حاجة، عمرو اتعذب».

وأشارت إلى أن والدها رحل متأثرًا بإصابته بنفس الورم الخبيث، قائلة: «أنا قعدت مع والدي سنة أنا اللي بعمل كل حاجة وباخد القرارات، ووالدي توفي وهو عنده نفس المرض وهو ميعرفش، وكان عندي وعي جامد معرفش إيه اللي حصلي ولكن ده لطف من ربنا.. وكنت بقول ربنا مش هيعمل كده معايا مرتين من بعد بابا ومش هيحصلي حاجة زي كده».

ومن جانبه، قال محمود ياسين جونيور إن والده المؤلف عمرو محمود ياسين اتصل به في أحد الأيام، وطلب منه العودة إلى المنزل في اليوم نفسه، قائلًا له إن لديهم موعدًا مع الطبيب، وهو ما أثار بداخله شعور شديد بالخوف والتوتر، بعدما أدرك أن هناك أمر يستدعي القلق.

وأوضح أنه انهار بالبكاء لحظة دخول والدته غرفة العمليات، لكنه حاول قدر الإمكان إخفاء مشاعر الخوف والقلق عنها، حتى لا تشعر بضعفه أو تتأثر حالتها النفسية، وكان يصور عملين فنيين في الوقت نفسه خلال فترة مرضها، بينما كانت والدته تحاول إخفاء وجعها وآلامها قدر الإمكان، ولا تظهر حجم معاناتها أمام أسرتها.

وأشارت آيات أباظة إلى أن زوجها عمرو محمود ياسين كان يمكث معها في المستشفى باستمرار، ويسهر إلى جوارها ولا يحصل على قسط كافي من النوم، رغم انشغاله بكتابة مسلسل كان من المقرر عرضه خلال موسم دراما رمضان.