أحمد حلمي عن أصعب لحظات حياته: تألمت خلال فترة مرض والدي

تحدث الفنان أحمد حلمي عن أصعب اللحظات التي مر بها في حياته، بسبب مرض وفاة والده، وموقف والدته أيضًا من الانتقال للعيش معه.

قال الفنان أحمد حلمي في تصريحات تلفزيونية له: «من أكثر اللحظات المؤثرة في حياتي ولم أنساها لما أبويا ضربني بالقلم وكان عمره ما مد إيده عليا.. خالي غاوي يربي حمام بأنواع غالية وبعدين روحت أنا وفتحت شباك الأوضة فالحمام طار، ومكنتش وقتها أعرف أن الحمام غالي ولا لأ».

أحمد حلمي ووالده

وتابع: «وبعدين خالي اشتكاني لأبويا كان خالي مخه صغير، فجاء أبويا شاف المنظر وسأل مين اللي عمل كده فكذبت وقلت أخويا خالد فهو مصدقنيش وضربني أنا لأنه عارف إني بكذب، وكانت المفارقة الرهيبة أن الحمام طلع بيرجع تاني يوم الصبح، وافتكر ان وقتها زعلت واتضايقت وعيط».

واستكمل الفنان أحمد حلمي قائلًا: «أحيانا أتمنى أرجع صغير علشان أعيش حاجات ملحقتش أعيشها أو نفسي أكررها، أبويا مات وأنا ملحقتش أشبع منه ولا أعيش معاه المرحلة اللي هي بتاعت الصحوبية».

أحمد حلمي

طفولة أحمد حلمي

وأضاف عن طفولته وفقدان والده، قائلًا: «هو مات وأنا في أوائل الجامعة وبعدين علشان هما قاعدين في بنها وأنا قاعد في القاهرة مكنتش بشوف أهلي كتير.. ملحقتش أحكي لأبويا ويحكيلي ونخرج ونرغي ونتكلم، وهو كان مريض ومر بفترة صحية صعبة، وفترة مرضه كانت صعبة جدًا عليّ لأني وقتها حسيت بالعجز ومش عارف أعمل حاجة».

وقال الفنان أحمد حلمي أيصُا: «حد بتحبه راقد وأنت مش عارف تعمل حاجة.. لحظة وفاة أبويا كانت صعبة وهو كان راجل صامت ومشاهد أكتر منه متكلم وحسيت بعد كده أنه له فضل كبير في تكويني وصفاتي وزعلان اني ملحقتش أخطف من وقت أبويا كتير وأتمنى الزمن يرجع بيا علشان أبقى معاه».

تصريحات أحمد حلمي

وعن موقف والدته من الانتقال معه، قال: «وبعد وفاته حاولت كتير أجيب أمي تعيش جنبي مبترضاش مش عايزة وحابة تبقى في بيتها وكانت امنيتي تبقى ساكنة في الشقة اللي جانبي بس احترمت رغبتها في البقاء في بيت والدي وأنا عمري ما هكون أناني وتألمت كثيرًا بعجزي خلال فترة مرض أبويا مكنتش قادر أعمل له حاجة».

واختتم أحمد حلمي: «وافتكر لما كنت بروحله المستشفى في العناية المركزة كنت أشوفه من خلف الزجاج وده شئ بشع ومن المشاعر البشعة إنك تشوف حد بتحبه في لحظة صعبة وسط الأجهزة والخراطيم، وفاكر مرة لما فتح عينه وبص وشافني وكنت وقتها لوحدي وقتها شاورلي بصباعه لفوق يعني ربنا يتولانا برعايته».

أحمد حلمي ووالده

الفنان أحمد حلمي