أحمد داود يكشف سر خوفه من مسلسل زينهم: اتهزقت بسبب الكرش

كشف الفنان أحمد داود كواليس وأسرار لأول مرة عن مسلسل زينهم بعد نجاحه، وتحدث عن سبب رفضه للعمل بالبداية بجانب عدم إظهار تفاصيل التشريح والجثث.

قال أحمد داود في تصريحات تلفزيونية له: «كنا مش عايزين دم كتير لأن مسلسل زينهم جمهوره من الأطفال أكثر من الكبار.. وكنت خايف من فكرة العرض في الأوف سيزون».

أحمد داود مسلسل زينهم

وتابع: «مسلسلات الأوف سيزون في السابق لم تكن إنتاجيًا تحظى بنفس الاهتمام، لكن المنتج تامر مرتضى شرح لي توجه الشركة المتحدة هذا العام لتقديم موسم قوي خارج رمضان وتخوفي الثاني كان إن المسلسل 30 حلقة وممكن الناس تزهق، ومع الوقت لقيت إنه إنتاجيًا معمول كويس جدًا».

كما تحدث أحمد داود أيضًا عن تركيب بطن له، قائلًا: «الكرش كان فكرة يحيى إسماعيل، وأنا بلعب وبتمرن في الجيم فجه قالي داود أنا حاسس أن هو ممكن يبقى بكرش فأنا أول رد قولتله ليه وكنت عايز أموت الفكرة، فقالي هو دكتور وبياكل ومش بيتحرك كتير ومطفي ومكتئب فحاسس إن عنده كرش صغنن.. وفي الأول كنت رافض جدًا وكل ما بنيجي نجرب بطن أقوله بص أنا شبه هشام ماجد في ماما حامل دا مش كرش».

أحمد داود مسلسل زينهم

تصريحات أحمد داود

واستكمل: «ونجرب اللي بعديه أقوله لا أنا حامل شكلي وحش أوي، وكنت عمال أموت الفكرة، لحد ما جه واحد كدا لبسته فصدقته، وكان معايا كريم قاسم قالي لا يا داود شكله حلو فأنا قولت أجرب أعمل كدا، واتهزقت كتير والناس صدقت».

وقال أحمد داود أيضًا عن مسلسل زينهم: «أنا مبسوط بزينهم ومبسوط بالحالة اللي عملها وعمري ما كنت أتخيل أبدًا، يمكن في الأول رفضت وكنت هبقى غبي جدًا لو معملتوش، وحقيقي أنا فخور أني كنت في المسلسل مع الممثلين دول شرف ليا لأنهم كلهم موهوبين جدًا وطيبين جدًا ودا اللي بيفرق معايا».

واختتم: «إحنا كنا بنشتغل في ظروف صعبة وكان يهمني جدًا أي حد شغال يبقى مرتاح ولا متضايق من حاجة إنتاجية، ولا على مستوى الورق عشان كدا كنت مسميه المسلسل الطيب.. والناس كانت بتتعامل معايا على أساس أني دكتور زينهم بس، والمسلسل في الأول كان اسمه ليالي زينهم وأنا كان عاجبني الاسم».

أحمد داود مسلسل زينهم

مسلسل زينهم

مسلسل زينهم