أحمد فهمي عن هنا الزاهد: صايعة إفيهات وبيننا لغة خاصة وفيلم مستر إكس قائم عليها

تحدث الفنان أحمد فهمي عن كواليس فيلم مستر إكس والتحضير له، قائلًا: «في البداية كنت بعمل فيلم تاني خالص غيره، وبعدين لقيت فادي دخل عليا وقالي حلو الفيلم ده وقالي فكرة الفيلم».

تصريحات أحمد فهمي

وتابع أحمد فهمي في تصريحات تلفزيونية له: «قولتله إلغي الفيلم وأنا هعمل ده، والحمد لله، وأوس أوس أول واحد كان معايا في الشغل، وبدأنا في تجميع أبطال العمل، والحاجات اللي بشتغل عليها مش بحب أنزل اسمي عليها، في مؤلف وفي فكرة لمين، ولازم أتكلم مع المؤلف وعايز أشكر محمد السبكي، علشان مش بيفرق معاه أي حاجة غير إن هو عايز يعمل فيلم حلو».

واستكمل قائلًا: «وقولتله عايزين نعمل فيلم كوميدي صورته حلوة جدًا، ويبقى نقلة لينا كلنا على مستوى الصورة، وطول الوقت بيخاف على الصناعة، ومواقف ضيوف الشرف كلها كتبناها من غير ما نعرف مين اللي هيعملها، وأفلام العيد كلها كانت كبيرة وأول مرة يحصل في العيد، ولو في فيلم واخد إيرادات كبيرة لازم تعرف واخد كام شاشة عرض، تامر حسني نجم كبير وعلى راسي، وكريم عبد العزيز، والفيلم لما راح الخليج بياخد نفس قاعات العرض، وتقدر تقول مين جاب أكتر ولا أقل».

أحمد فهمي فيلم مستر إكس

أحمد فهمي وهنا الزاهد

وعن علاقته بزوجته الفنانة هنا الزاهد، قال أحمد فهمي: «في لغة بنتكلم بها أنا وهنا بنغير أول حرف ونحط س، وهي بتعرف تقول الإفيه بوزنه، وبتقوله زي الولاد عادي، وصوت مش لايق على الشكل، تلاقي باربي بصوت علي الشريف، صايعة إفيهات، والفيلم قايم عليها، وبضايق من الناس اللي تقولك بقالي كتير بعمل دراما فتعبت وهريح شوية بحاجة كوميدي بالعكس الكوميدي أصعب».

وأضاف الفنان أحمد فهمي قائلًا: «لو محمد أنور طلب من هنا الزاهد إفيه بتكون جاهزة، وده ظهر في فيلم مستر إكس، وهي قادرة تعمل الحتة بتاعة الصوت، مش لايق على الشكل بس علشان تطلع الإفيه حلو، وحدوتة فيلم مستر إكس قايمة على هنا الزاهد، وهي فعلا دورها مؤثر جدًا في الفيلم، وفيه ما بينا لغة خاصة».

أحمد فهمي وهشام ماجد وشيكو

وفيما يخص علاقة أحمد فهمي وهشام ماجد وشيكو، قال: «السؤال عن انفصالي عن هشام ماجد وشيكو مش بيضايقني خالص، هما صحاب فضل كبير جدًا عليا وعلى نجاحي دلوقتي، حتى نجاحي في مستر إكس، أنا بدين بالفضل ليهم لأن جزء كبير من اسمي هما الفضل فيه».

واستكمل: «وعلاقتي بهشام ماجد وشيكو مبقتش زي ما كانت قبل الانفصال بس أنا متأكد إني لو رفعت عليهم سماعة التليفون هلاقيهم قبل أي حد، لأن بحكم شغلنا مبقناش نتقابل زي الأول، لكن الصحاب مش بالمقابلة، بلما تحتاجه هتلاقيه، وهشام ماجد وشيكو عمري ما طلبتهم في حاجة وملقتهمش».

أحمد فهمي

أحمد فهمي