أحمد موسى: الأهلي في منتهى الروعة.. ومش مهم الدوري خدناه كتير.. فيديو

هنأ الإعلامي أحمد موسى الكابتن محمود الخطيب ولاعبي وجماهير النادي الأهلي، بعد فوز الفريق بثلاثة أهداف مقابل لا شيء على الزمالك، في المباراة التي جمعت بينهما اليوم.

وقال الإعلامي أحمد موسى خلال بث مباشر على صفحته الرسمية على موقع التواصل الاجتماعي 'فيسبوك': 'الأهلي كان في منتهى الروعة وإحنا الأهلاوية مبسوطين جدًا مبروك، مش مهم الدوري خدنا الدوري كتير أوي وعندنا فروع كتير مش لاقيين مكان نحط فيها البطولات، وفرحة الفوز عندي أهم الدوري'.

وأضاف:'محدش يزعل يا جماعة، يا جماعة إحنا بنتكلم عن كورة وروح رياضية، الحمد لله وإحنا روحنا الرياضية حلوة، ادلع يا شحات، فكرني بأيام محمود الخطيب، ويا سلام على الجول الأول بتاع بن شرقي، ودفاع الزمالك النهاردة شوربة، والأهداف كلها أخطاء من الزمالك وكان ممكن تريزيجيه يجبلنا الرابع النهارده، والنهارده أحلى ماتش شوفته للأهلي طوال الموسم، مبروك، حبايبي الزملكاوية'.

وأوضح:'80 مليون أهلاوي النهارده فرحانين والشوارع النهارده نار نار يا حبيبي وسهرة وفرحة كبيرة، هذه هي روح النادي الأهلي، الأهلي فوق الجميع، وعبدالله السعيد النهارده كان وحش أوي خلص اللي عنده، 80 مليون أهلاوي فرحانين والدوري لسه في الملعب وهذه البطولة عظيمة تحية لكل أهلاوي في كل مكان و3 أهداف ملعوبة ولا أجمل ولا أروع من كده، والنهارده'.

وتابع:'من أفضل الماتشات اللي شوفتها للنادي الأهلي النهارده، مبروك مبروك، أفرحوا أنبسطوا، والأهلي لعب الشوط الأول الزمالك مجاش يا جماعة، أنا راجل بلعب وبشجع كورة، والزمالك مجاش النهارده ومتزعلوش وجماهيرنا الزمالك متزعلوش '.

واختتم:'ألف مبروك ألف مبروك، هذا هو النادي الأهلي، مباراة جميلة ورائعة، مبروك الكابتن محمود الخطيب، مبروك للجهاز الفني، مبروك لكل لاعب في هذه المباراة، ومبروك لـ الـ 80 مليون أهلاوي، والأهلي حديد، مبروك ليكم كلكم'.

لمشاهدة البث المباشر اضغط هنـــــــــــــا