أسما شريف منير: بقيت بحب شكلي بفلتر وده شيء محزن

تحدثت البلوجر أسما شريف منير عن أسباب حذفها لجميع صورها عبر حسابها بموقع إنستجرام، مشيرة إلى إنها أصبحت تحب شكلها بالفلتر، وهذا الأمر مزعج بالنسبة لها.

أسما شريف منير وإنستجرام

نشرت أسما شريف منير عبر حسابها بموقع إنستجرام صور، وكتبت: 'شلتي كل صورك ليه؟ عشان عايزه اشارك معاكم حاجة تفرق، تفرق مع شخص واحد بس! طب و هو ايه يعني اللي هيفرق في الصور دي؟'.

وتابع: 'اول حاجة عايزه اوصلها من الصور دي، انها من غير اي اديت او فلتر، و دي حاجة انا في صراع دايم فيها، عشان بقيت بحب شكلي ب فلتر اكتر و ده شيء محزن، فا محتاجة احس اني حره من الفلاتر و الاديت عشان اشجع بنات تكون حسه احسن'.

واستكملت أسما حديثها، وقالت: 'تاني حاجة في صور من شغلي و مشروعي اللي تعبانه فيه جداً و محتاجة اشاركوا معاكم عشان اشجع الناس انها تاخد خطوه في انها تبدأ من الصفر عادي مهما كانت مكانتها الاجتماعية. تالت حاجة مشروعي الاصغر هو الفخار'.

وأردفت: 'ده انا عملته عشان اشجع المنتجات اليدويه الطبيعيه الصحية وعشان انا دلوقتي بختار اغلب اختيارتي في الحياة اي حاجة راجعة للطبيعة'.

تصريحات أسما شريف منير

وأضافت أسما شريف منير: 'رابع حاجة، لما تخنت كنت مكسوفة بس تقبلت جسمي و حبيته بس ده مش معناه اني مش عايزه اوصل لأفضل شكل صحي ل جسمي، فا شغاله عليه و عندي خطة للتغير، بس لحد ما اوصل للنتيجة الصح انا حابه نفسي و انوثتي و شايفة نفسي تمام اوي. خامس حاجة، اني بحلم احلام ناويه بكل قوتي احققها فا بقيت بحط نفسي في الاماكن اللي شبه حلمي، بجذب الناس اللي بتفيدني، بحلم احلام كبيرة بس مش و انا قاعده علي الكنبة، و انا بسعى في شغلي و مصدقة اني هوصل ل اكتر ما بتمني و ده بقولو عشان اشجعكم انكم تتحركوا و متأجلوش اللي نفسكم فيه مهما كانت الحاجة اللي موقفاكم'.

واختتمت كلامها قائلة: 'سادس حاجة، التأمل في خلق الله، غير حياتي و خلاني اكون شخص اهدي و ممتن اكتر، و حساس اكتر. انا حقيقي نفسي افيدكم و اساعد اللي بيتابعوني يكونوا احسن ب اي طريقة ممكنه، و انا بحضر حاجات جديدة اتمنى انها تكون مصدر إلهام ليكم، وحشتوني اوي'.