أسما شريف منير للمنفصلين في أول يوم مدرسة: «الطلاق مش معركة وولادنا مش الضحية»

شاركت أسما شريف منير متابعيها بنشرها صور جديدة، من الاحتفال بأول يوم مدرسة لابنتها برفقة طليقها وزوجها.

علقت أسما شريف منير على الصور التي نشرتها عبر حسابها الرسمي بموقع انستجرام: «السنة الـ 13 للصورة اللي بقت من أحلى عاداتنا.. صورة واحدة كل سنة بس عمرها ما بتبقى نفس الصورة إحنا بنتغير ولارا بتكبر قدام عينينا وكل سنة بنكتشف فيها نسخة جديدة منها، واهتمامات جديدة وشخصية بتتكون وتفاصيل بنحب نشوفها وهي بتتغير سنة ورا سنة».

وتابعت: «السنة دي أحب أفكر أي حد بيعدي بانفصال أو طلاق، إن الانفصال أو الطلاق مش لازم يتحول لمعركة، ومش لازم ولادنا يدفعوا تمن إن علاقة بين اتنين كبار مكملتش».

واستكملت أسما شريف منير: «ممكن العلاقة تنتهي، لكن الاحترام مينتهيش، ممكن كل واحد يكمل حياته، يحب ويتجوز ويبدأ من جديد، من غير ما الطفل يحس إنه لازم يختار طرف، أو يحس بالذنب عشان بيحب كل الناس اللي في حياته».

وأضافت: «أنا الحمد لله ممتنة جدًا إن لارا حواليها ناس بيحبوها بجد، أبوها عايز يشوفها مرتاحة وناجحة وسعيدة، وأحمد بيحبها بجد وعايز يشوفها مرتاحة وناجحة وسعيدة، وأنا في الآخر كل اللي يهمني إن بنتي تكبر وهي عارفة إن حب الناس ليها مش منافسة، وإن مفيش حد محتاج ياخد مكان حد.. كل واحد له مكانه، وكل واحد له دوره، والأهم إن هي تبقى في النص محاطة بالحب، مش محطوطة في النص بين خلافات الكبار.. يمكن دي أهم حاجة أحب أفكر بيها أي أب وأم انفصلوا.. حطوا ولادكم قبلكم».

واختتمت: «احترموا بعض عشانهم، وسيبوهم يحبوا كل الأطراف من غير خوف ولا إحساس بالذنب، وفي الآخر، يمكن أنجح حاجة ممكن نعملها بعد ما علاقة تنتهي، إننا منخليش معاها إحساس الأمان عند ولادنا ينتهي، الحمد لله على لارا، وعلى كل سنة جديدة بناخد فيها الصورة دي، وعلى إننا لسه بنشوفها بتكبر قدام عينينا وإحنا كلنا بنحبها».