أكرم حسني يكشف أسراره: بخاف من المرض طول الوقت

كشف الفنان أكرم حسني أسرار من حياته الشخصية، والفنية، كما تحدث عن وفاة والده وتأثره بالأمر.

قال أكرم حسني في تصريحات تلفزيونية له، إن والده استمر يعاني من المرض 4 سنوات، مضيفًا: «وفاة والدي كانت مفاجأة، وكان في مرحلة طويلة قبل وفاته حوالي 4 سنين بشوفه طول الوقت بيتألم وتعبان والصحة بتتدهور».

أكرم حسني ووالده

وتابع: «وساعات لما بيحصل أزمات ونروح المستشفى.. كنت بتمنى له الراحة.. المرض بيضعف وعشان كده أنا عندي خوف من المرض طول الوقت أصعب اللحظات اللي بتمر على البني آدم وهو مريض، وأكيد ماكنش نفسي أفقد أبويا بس مش عايز أشوفه بيتألم أو بيتعذب».

واستكمل الفنان أكرم حسني حديثه عن وفاة والده: «لما حصلت الوفاة ربنا نزل عليا سكينة وطمأنينة أنه دلوقتي مرتاح وفي مكان أحسن، وأنه ارتاح من العذاب اللي كان بيشوفه وكنت متطمن عليه وماكنش عندي حالة الانهيار اللي بتحصل في حالات الوفاة.. وبعدها بأسبوع كملت بروفات مسرحية بدأتها».

وأضاف أيضًا: «مفيش حد بينسى أبوه وهيفضل طول الوقت معايا وجوايا بس ساعات الشغل بيخليك تتجاوز.. والنجاح بالنسبة لي أحلى فترات حياتي وبالنسبة لي أنك تعمل حاجه بتحبها وتلاقي ردود أفعال زي ما بتتمنى.. والفن شقين الشق الأول أنك مستمتع وأنت بتعمل ده والشق التاني هو أن ده شغلك اللي بيأكلك عيش».

أكرم حسني

تصريحات أكرم حسني

وفيما يخص عمله قبل الفن، قال: «أنا سايب كارير مختلف عشان بحب الفن، من وأنا صغير وعايز أبقى حاجه في الفن.. ومجموعي مجبليش أني أدخل فنون جميلة أو معهد فنون مسرحية.. وظابط الشرطة وظيفة مهمة بس مكنتش شبهي، وأبويا كان شايف وظيفة ظابط الشرطة المجتمع بيحترمها».

وقال أكرم حسني أيضًا: «بس بالنسبة لي أنا كنت عايز أروح ناحية الفن.. بحب صناعة الأغاني وجت فترة من الفترات حبيت أدرس وجبت مدرس من كلية تربية موسيقية قولتله أنا مش عايز أدرس المنهج عايزك تحببني في المزيكا أكتر قولتله مش عايز اتعلم منهج».

كما تحدث الفنان أكرم حسني عن أسرته وعلاقته بهم، قائلًا: «والدتي كانت أقرب لي من والدي، وأنا أب لولد وبنت، وعلاقتي بأولادي بتمثل لي شيء كبير، والجيل بتاع أولادنا بيفكر غيرنا».

واختتم: «طفولتي كانت هادية وفيها أحلام كتيرة، وكان عندي تمرد مكنتش صانع للمشاكل ولا بحب الزعل».

أكرم حسني

أكرم حسني