طالب يشكو من تعرضه للتنمر خلال اختبارات كلية التربية الرياضية ..والجامعة ترد: افتقد أحد شروط القبول

تداول رواد التواصل الإجتماعى' الفيس بوك'واقعة مؤسفة لطالب أنهى دراستة فى الثانوية العامة وقدم أوراقة للإلتحاق بكلية التربية الرياضية بجامعة كفر الشيخ وتعرض للتنمر خلال تقديمه في اختبارات كلية التربية الرياضية، حيث روى الطالب أحمد عمر من أبناء محافظة كفر الشيخ، واقعة التنمر بسبب شكل وجهه.

وفى السطور التالية يحكى الطالب قصتة كما نشرها عبر صفحته الشخصية بوقع التواصل الاجتماعي «فيس بوك» : «موقف حصلي انهارده وانا بقدم كلية تربيه رياضيه، رحت الساعه ٩ الكليه عشان أقدم الورق وادخل الاختبارات، وقعدت انزل واطلع من الساعه ٩ للساعه ١ وبعد كدا قعدت ساعه على ما دخلوني ودفعت ٤٥٠ جنيه الأول غير الورق اللي صورته، ويضيف الطالب ... قست الطول والوزن وطلع مناسب جدا، وبعد كدا رحت للدكتور التاني عشان الاختبار' انزل عشره ضغط' أقف على مشط رجلك ونط، اقعد واقف وانت مربع من غير ما تسند وبعد كدا قالولنا ننزل الكمامه وبعدها لقيت نظراته ليا اتغيرت وقعد مركز معايا شويه ومركز فى شفتي اوي».

يستكمل الطالب روايتة: «بعدها 'ندهلي ' قالي اسمك اي قولتله كذا كذا يادكتور قالي اي اللي فى 'شفتك ' دا، قولتله عمليه حضرتك وبعد خمس شهور بالكتير هعمل عمليه تانيه وشفتي هترجع طبيعيه وهشيل التقويم وهبقا زي الفل، فقالي طب ارجع تاني وقفت مع زمايلي فلقيته قالهم روحوا انتو للخطوات اللي بعد كدا وقالي أقف انت عاوزك، طبعا انا استغربت.. اللي هو في أي وبعدين اي 'البصات اللي بيبصهالي دي فى».

وتابع الطالب في روايته : «بعد ما ذنبني شويه قالي تعالى، فروحت قالي روح البس هدومك وروح، قولتله ليه يا دكتور دا انا حتى لسه ما دخلتش اختبار الجري، ولا حتى الخطوات اللي بعد كدا.. قالي انت شكلك مينفعش.. قالي عشان مصلحتك بس قولتله الكليه كلها حركه وجرى وسباحه ولو في بوكس وملاكمه ف انا بقول لحضرتك انا بعد خمس شهور كل دا هيبقا زي الفل.. قالي انت كشكل اصلا مينفعش يبني وبعد كدا قالي يلا اتفضل روح البس وروح... طب اقسم بالله ان كان معايا واحد ميقلش عن ١٢٠ كيلو واتقبل عادي... نزلت سألتهم وقولتلهم عاوز ال٤٥٠ بتوعي عشان امشي لاني لسه حتى مدخلتش الاختبارات ولا عملت اي حاجه يعني دفعتهم عالفاضي الاقي الأمن يقولي بح ياباشا ... مينفعش تاخدهم تاني».

واختتم الطالب أحمد عمر: «طلعت لحد مهم فوق ف مكتبه قالي طالما كتبت اسمك عالظرف يبقى متعرفش تاخدهم.. قولتله تمام بس انا اصلا مدخلتش الاختبارات يعني لو دخلت اوك إنما أنا مدخلتش.. ان جيت للحق معاملته كانت في منتهى الاحترام بس على كلامه انه ميقدرش يعمل شئ نزلت وانا مش مسامح ف الفلوس طبعا.. اللي موتني أن انا ليه متقبلتش.. علشان شكلي مش لايق عالكليه على كلام اللي كان فوق ف الكشف الطبي.. يعني انا قبيح.. بلد ماشيه بالعنصرية طول عمرها.. انا وانا طفل ياما خدت تريقه و اتعنصرت عنصره هدت امالي وطموحاتي في حاجه انا مليش ذنب فيها».

من جانبها أصدرت كلية التربية بجامعة كفر الشيخ برئاسة الدكتور عبد الحليم مصطفى عكاشة بيانا توضح تفاصيل ما حدث مع الطالب أحمد عمر  وأكدت فيه أن الطالب المتقدم يمر بعده مراحل اولها وبعد دفع المصروفات المقررة من قبل مكتب التنسيق الرئيسي للجامعات المصرية.

وكشفت أن الطالب يبدأ بالكشف الطبي المبدئي علي القلب ثم ينتقل الطالب اللائق فقط الي الاختبار الثاني وهو اختبار قياس الطول والوزن ثم ينتقل الطالب اللائق فقط إلى الاختبار التالي وهو اختبار القوام ثم ينتقل الطالب اللائق فقط الي الاختبار التالي وهو اختبار السمات الشخصية ثم ينتقل الطالب اللائق فقط إلى الاختبار الرياضي ويتم ذلك من خلال لجان سير محددة من قبل كنترول مسئول عن ذلك ،ويتم استبعاد الطالب الغير مستوفي للشروط أولا بأول.

وتابعت كلية التربية : «أما ما حدث لابننا العزيز أحمد عمر أنه افتقد أحد شروط القبول بالكلية في احدي اللجان المتخصصة وهي لجنة القوام ، وهذا ليس معناه أنه بهذا الوصف الذي يصف به نفسه علي الاطلاق ومن الممكن أن يكون مبدع جدا ومتميز جدا عند التحاقه بأي كلية نظرية غير كلية التربية الرياضية».

وأكد البيان : «نحن أبداً أبدا لا نرضي بأن يهان لدينا أي طالب علي الاطلاق بدليل أن أحد الأساتذة المتخصصين في اللجنة نفسها تحدث مع الطالب علي انفراد ومن قرب نظرا لمراعاته نفسياً واوضح له سبب عدم قبوله وذلك نظرا للنواحي الانسانية والتي فهمت عكس ما قصدي منها تمام» .

وشدد الدكتور عبد الحليم عكاشة عميد كلية التربية الرياضية أن اختصاصات لجنة اختبار القوام والتي يقف فيها الطالب أمام لجنة الاختبار بالشورت الرياضي فقط حتي تتمكن اللجنة من رؤية جميع اجزاء جسم الطالب والتأكيد من خلو جميع هذه الأجزاء الظاهرة من أي عيوب أو انحرافات قواميه تعيق الطالب عن الاستمرار والنجاح في العمل في هذا المجال فيما بعد ولذا تطلب اللجنة من الطالب عمل بعض المهارات الحركية التي تبين خلوه تمام من هذه العيوب الخلقية والبدنية وكل هذا لصالح الطالب قبل التحاقه بالكلية.

5 نصائح للتغلب على التنمر وكيفية مواجهته.. فيديو

بعد موافقة «التشريعية».. كل ما تريد معرفته عن قانون مواجهة التنمر.. فيديو

حبس المتهمين بالتنمر علىى شاب من ذوي الاحتياجات الخاصة بالجيزة