أوس أوس يروي قصة القبض عليه في إيطاليا.. ما علاقة فيلم رمسيس باريس؟

روى الفنان محمد أسامة الشهير بـ أوس أوس كواليس موقف صعب، تعرض له في إيطاليا أثناء تصوير فيلم رمسيس باريس.

قال أوس أوس عبر تصريحات تلفزيونية: «كلموني في فيلم رمسيس باريس وكان محمد ثروت عنده مشكلة مش هينفع يسافر وقالولي أرجوك تعالى، طلعت الفيزا شينجن وصبغت شعري أزرق وحضرت نفسي، ولأن الشينجن كنت مطلعها لإيطاليا سافرت على إيطاليا الأول وبعدها قلت أسافر داخلي لباريس، نزلت إيطاليا كان يوم 2 يناير مفيش حد في المطار غير أنا والناس اللي في الطيارة وكان وقتها كورونا».

قصة القبض على أوس أوس في إيطاليا

وتابع: «وأنا داخل سألني شخص أنت ليه جاي هنا رديت أنا كل سنة باجي إيطاليا مكنتش عايز أقوله أني ترانزيت ورايح فرنسا عشان عايز أخد ختم دخول إيطاليا عشان تبقى الدنيا أمان وبعدها أسافر داخلي، سألني هتقعد فين قلت له صديقي مستنيني ورا المطار قالي أوكي».

واستكمل أوس أوس: «وجيه ظابط وقالي اتفضل معانا وأنا مش فاهم في إيه وهما واخدين باسبوري، رحت معاهم ودخلت أوضة كلها ناس محبوسة قلت سلام عليكم يمكن ألاقي أي حد عربي مفيش وهما شكلهم مرعب وقعدت مش عارف هعمل إيه جالي الظابط جايبلي ورقة كبيرة بالإيطالي المفروض أحلها، اللي اكتشفته إني جاي بفيزا سياحة وهما قافلينها فكل اللي كانوا معايا دخلوا لأنهم تعليم أو إقامة لكن أنا معايا سياحة».

تصريحات أوس أوس

وأضاف: «أنا طلعت الفيزا من القنصلية لأن الدنيا كانت قافلة وأخدتها سياحة، الظباط قالي كلم صاحبك اللي واقف برا قلت له إني معييش رصيد راح واخد موبايلي ووصله بانترنت المطار وطلب مني أكلمه أونلاين، كلمت الراجل اللي في القنصيلة اللي أنا رحت له هو مصري وبيتكلم إيطالي، قلت له أنا في إيطاليا قالي إيه اللي وداك إيطاليا أنت مش قلتلي عندك فيلم في فرنسا قلت له أيوة، قالي ما الشينجن دي بتدخل أي بلد».

واختتم أوس أوس: «قلت له ما أنا خفت وقلت لازم أخد ختم، راح كلم الظابط وقاله إني ممثل مصري ورايح أصور في باريس وجاي أقعد يومين في إيطاليا عشان متعود، قالوله أوك ومشيوا وبعدها الظابط رجع وختم لي الباسبور وقالي هما بس يومين».