إبراهيم سعيد لـ شيكابالا: كنت بتتحايل على عدلي القيعي علشان تروح الأهلي

هاجم إبراهيم سعيد، مدافع الأهلي ومنتخب مصر السابق، محمود عبدالرازق شيكابالا، نجم الزمالك، نافيا أن يكون الفهد الأسمر من أساطير الزمالك ولا يجب أن يقول عن نفسه إنه زملكاوي صميم.

قال إبراهيم سعيد، في تصريحات تليفزيونية:" يا كابتن شيكابالا فيه زملكاوي جدا زملكاوي صميم يهرب من نادي الزمالك يطلع على اليونان وبعد كده ترجع تعمل رغبة كتابية وفيه لقاء تليفزيوني بتقول فيه إن رغبتك هى اللعب في الأهلي ومضيت في الأهلي وخدت فلوس كمان؟!!".

أضاف إبراهيم سعيد:" طيب أقول لك حاجة، والله العظيم أنا عرفتك وأنا بلعب كورة عن طريق النادي الأهلي، وممكن يا هروبة أعد لك أنت هربت كام مرة من الزمالك، وكنت بتتصل بالمهندس عدلي القيعي وتتحايل عليه عشان تروح الأهلي".

تابع:" عشان ماتهزرش زي ما قولت في التليفزيون أنت لقيت نفسك مش قادر تروح وقولت هلعب إزاي في الأهلي ومش عارف إيه، فأنت اللي طلبت من الأهلي إنه يضمك عشان الأهلي يدفع لك الفلوس ويخلص موضوع باوك".

أشار إبراهيم سعيد:" بعدين لما أنت تسيب الأهلي فأنت اللي خسران، أنت بقالك 22 سنة بتلعب مخدتش دوري الأبطال ولا هتشوفها، وبعدين أنت عملت مشاكل مع كل المدربين اللي اشتغلت معاهم، بدءً من الأسطورة الزملكاوي الصح الكابتن حسن شحاتة".

أتم إبراهيم سعيد:" وبعدين والله العظيم الوقت إللي إحنا كنا بنلعب فيه أنت كشيكابالا ولا تقعد احتياطي أصلا ولا تتمرن معانا أساسا في منتخب مصر، تقعد في المدرجات وتتفرج علينا وتتعلم كورة، مستواك ماينفعش تلعب معانا".