«إيلا».. هشام جمال وليلى زاهر يحتفلان باستقبال طفلتهما الأولى

احتفل الفنان هشام جمال والفنانة ليلى زاهر باستقبال طفلتهما الأولى «إيلا».

شارك هشام جمال وليلى زاهر متابعيهما والجمهور، بنشر صور تجمعهما مع «إيلا»، وحرصا على إخفاء وجهها.

وبعد أشهر من الترقب، يخوض الثنائي تجربة الأبوة والأمومة للمرة الأولى.

كانت قد كشفت الفنانة ليلى زاهر كواليس إخبارها لزوجها الفنان هشام جمال، بحملها في طفلهما الأول.

قالت ليلى زاهر عبر تصريحات تلفزيونية: «معرفتش إني حامل وهشام معايا كنت مسافرة كتمت الموضوع شوية لوحدي لحد ما رجعت من السفر، إحساس لما تعرف وأنت وحدك يعني إيه أنا حامل أصلا».

وتابعت: «فضلت ساكتة عشان كنت عايزة أقول له هو أول واحد كان في مشاعر ملخبطة اتخضيت فضلت أضحك وعايزة أعيط وكان عندي شغل وكنت بتعامل عادي أن مفيش حاجة وكنت تمام لما رجعت الأوتيل فضلت أقول هقوله إزاي عشان تبقى حاجة مختلفة لأنه أول بيبي».

وأشار هشام جمال إلى أنه قبل سفر ليلى زاهر للعمل كانا يشكان في حملها وعندما اتصل بها وسألها إن كانت أجرت اختبار حمل أخبرته أنها ليست حامل.

واستكملت: «دورت أونلاين على لبس للبيبي وكان معايا اختبار الحمل، ولما رجعت من السفر حطيت الحاجات على السرير وناديت عليه كان نفسي أصور اللحظة دي عشان تبقى موجودة، طول الوقت من كتر توتري وأنا بقوله كان جسمي بيترعش وخايفة مش من رد فعله، هو اتخض لأنه مكنش متوقع ومش متعود عليا إني أخبي عليه حاجة وأنا فضلت أعيط».

وتابعت ليلى زاهر: «لما عرفت إني حامل فضلت اسأل شات جي بي تي هو أنا ينفع أكل عادي وأشرب عادي وأركب طيارة حاجات بديهية».