ابنة محمد مرزبان بعد أسبوع على رحيله: مش قادرة أصدق إن دي الحقيقة

حرصت ابنة الفنان محمد مرزبان على رثاء والدها بعد أسبوع على وفاته، متأثرًا بإصاباته في حادث سير مروع.

كتبت ابنة محمد مرزبان رسالة مؤثرة، عبر حسابها الشخصي بموقع فيس بوك، قائلة: «يا بابا عدى أسبوع من ساعة ما مشيت، ولسه مش قادرة أصدق إن دي الحقيقة.. لسه مستنياك تدخل من الباب أو أسمع صوتك بتناديني».

رسالة ابنة محمد مرزبان

وتابعت: «مش قادرة أستوعب إني مش هشوفك تاني ولا هسمع صوتك إلا في الصور وvoice notes اللي بقيت بسمعها كل يوم وأسمع نصايحك ليا و (صباح الفل يا شهودة) عشان أصبّر نفسي.. كل يوم بصحى من النوم بتمنى إنه يكون كابوس وإن مفيش حاجة حصلت وأشوفك تاني».

واستكملت ابنة محمد مرزبان: «كان نفسي تقوم بالسلامة وتشوف حب الناس من اللي تعرفك واللي متعرفكش، وكان نفسي تسمع الكلام الحلو اللي بيتقال عليك من كل الناس، والناس اللي وقفت جنبنا ومعانا وبتعمل ده من حبها فيك، وقد إيه سيرتك طيبة وحلوة إحنا عيشنا ولسه وهنفضل عايشين متشرفين إنك أبونا».

مرور أسبوع على وفاة محمد مرزبان

وأضافت: «كان نفسي في حاجات كتير أوي لسه نعملها مع بعض.. خروجات، وسفريات، وقعدة البيت ناكل على سفرة واحدة، وحسن وحمزة يصدعوك من كتر الكلام، وفرح Jessy وAhmed، وفطار يوم الجمعة بعد الصلاة، قعدتنا نتفرج على فيلم ونتجمع نتفرج على ماتش وحاجات كتير أوي أوي أوي.. مشيت وسيبت فراغ كبير أوي قلبي واجعني يا بابا.. بس أنا حلمت بيك وأطمنت إنك بخير وفي مكان أحلى بكتير، وربنا بعتلنا علامات كتير تطمّنا عليك يا حبيبي».

واختتمت ابنة الفنان محمد مرزبان: «كان نفسي أقولك كل يوم إني بحبك.. كان نفسي أحضنك وأبوسك كل يوم.. كان نفسي أقولك كل يوم إنك أعظم أب في الدنيا.. بس أنا هفضل كل يوم أدعيلك وأحاول أكون نسخة تانية منك وأعمل الحاجات الحلوة والخير اللي كنت بتعملها، وأربي عيالي أنهم يبقى شبهك وزيك.. بحبك أوي يا حبيبي يا روح قلبي وإن شاء الله نتقابل في الجنة.. الله يرحمك يا حبيبي».