ابنة مفيد فوزي: والدي كان نفسه يعمل حوار مع عبلة كامل.. كان مؤمن بيها

كشفت حنان ابنة الصحفي مفيد فوزي، العديد من الأسرار عن والدها الراحل وتفاصيل حواراته المختلفة التي أجراها مع العديد من نجوم الفن.

ابنة مفيد فوزي تكشف مفاجأة

قالت حنان مفيد فوزي في تصريحات تلفزيونية إن أحد الفنانين الذين أراد والدها مقابلتهم هي الفنانة عبلة كامل: 'الفنانة اللي كان نفسه يعمل معاها حوار ومقدرش هي الفنانة عبلة كامل'.

وتابعت: 'كان مؤمن بيها جدًا، في ناس بتقدر تطلع تتكلم عن نفسها لكن عبلة كامل كانت شايفة إن وجهتها في أدوارها إللي بتقدمها'.

واستكملت حنان مفيد فوزي حديثها، قائلة: 'بابا مش محتاج إني أعمل ليه فيلم تسجيلي، دائمًا لما بقلب على السوشيال ميديا بلاقي بيظهر ليا، وقدر يعمل حوارات مع فنانين كتير منهم أحمد زكي اللي مكنش بيوافق يعمل حوارات نهائي، بالإضافة إلى الفنان عمرو دياب'.

الأيام الأخيرة في حياة مفيد فوزي

وكانت روت ابنة مفيد فوزي كواليس الأيام الأخيرة في حياة والدها الراحل، وحالته الصحية قبل وفاته، كما انهارت بالبكاء بعد قراءتها لمقال له على الهواء.

قالت الكاتبة الصحفية حنان مفيد فوزي في تصريحات تلفزيونية لها: «بابا عمل 3 عمليات في الفترة الأخيرة، عملية توسيع القنوات المرارية، وعملية توسيع الاثنا عشر، وعملية توسيع المعدة، وتعب جدًا».

وتابعت ابنة مفيد فوزي قائلة: «وفقد إصراره على الاستمرار، وسيادة الرئيس عبد الفتاح السيسي كلمني بنفسه كذا مرة، وكان عنده إصرار إن بابا يتنقل لمستشفى عسكري، لكن حالته كانت لا تسمح ورفض العلاج على نفقة الدولة».

تصريحات ابنة مفيد فوزي

واستكملت: «بابا تعب وكان عايز يرتاح، والحمد لله هو عاش لعمر 90 سنة وده عمر كبير، وشافني على الشاشة»، وانهارت بالبكاء قائلة: «بابا كان عنده عيب خلقي في القلب بين الأذين والبطين، وحصلت تعقيدات في القلب وبدأ الأكسجين يقل، وقبل ما يركبوا له جهاز التنفس الصناعي طلب مني أمشي من المستشفى».

وقالت حنان مفيد فوزي أيضًا: «كان في قسم الرعاية ودي درجة أعلى من العناية، وتحايلت عشان أشوفه بعد تركيب جهاز التنفس الصناعي، ولقيت عينه مفتوحة وكان واعي إلى حد ما، وآخر مرة مسك إيدي بقوة وكان بيودعني».

بكاء حنان مفيد فوزي

وأضافت: «بابا بالنسبة لي مسافر أنا مقدرش استحمل المعاني اللي فيها وفاة ورحيل وفراق، مبقدرش استحملها، بالنسبة لي بابا سافر لأنه كمان كان بيسافر كتير، صحيح المرة دي طول لكن معلش هو حواليا أنا كنت بقول الانترو، وكنت بسمعه لأني عارفة إن روحه حواليا، الصعب بالنسبة لي أن كل ما الدنيا تتقدم شوية، أبدأ استوعب وعارفة أنه في مكان حلو لأنه كان إنسان حلو».

وعن حالته الصحية، قالت أيضًا: «بابا تدهورت صحته فجأة على مدار شهر وفي الآخر كان على جهاز التنفس الصناعي، وقبل ما يدخل المستشفى بيوم كان بيكتب المقالات بتاعته عمره ما توقف عن الكتابة، وفي أوقات كنت بقوله أنت بتحب الكتابة والشاشة أكتر مني، وكان يقول لي (إنت روحي، أنا بس عاشق لمهنتي)».

واختتمت ابنة مفيد فوزي كلامها: «كل ما أقابل حد يقول لي أنتي شايلة على ظهرك تاريخ كبير، أبوكي سايب لك سيرة مهولة، والحقيقة انهارت بعد رحيل والدتي لكن وجود والدي معايا كان ساندني».