الناقد عبد الله غلوش عن حمادة هلال: ابن حلال.. لا بيحارب حد ولا عايز مكان حد

حرص الناقد الفني عبد الله غلوش بالاشادة بما يقدمه الفنان حمادة هلال من خلال المواسم الأربعة التي قدمها في مسلسل المداح.

عبد الله غلوش يشيد بالفنان حمادة هلال

كتب عبدالله غلوش عبر حسابه بموقع التواصل الاجتماعي فيسبوك: 'انك تعمل براند رمضاني بإسمك في الزمن ده، موضوع مش سهل في ظل منافسه صعبة وجمهور مش اي حاجه بتعجبه او تدخل دماغه خاصة لو بتقدم لهم نوع من الدراما مش متعودين عليه، وده اللي نجح فيه حمادة هلال وصناع مسلسل المداح'.

وتابع: 'للسنة الرابعة على التوالي بينجح انه يحافظ على وجوده في قائمة الأعلى مشاهدة ومتعجب انه بعد ١١٠ حلقة لغاية النهارده لسه قادرين يلاقوا حكايات وافكار جديدة'.

حمادة هلال ومسلسل المداح

واستكمل غلوش: 'المسلسل السنة دي مش مجرد رعب وشعوذة وعفاريت وصراع بين انس وجن زي ما بيعتقد البعض، اد ما هو بيشرح اساليب اهل الشر في التشكيك في الثوابت والتشكيك في دينك واهلك ووطنك، وده الدور اللي بتلعبه كاسيا او مي سليم اللي بتجند البلوجرز والمؤثرين لنشر الاكاذيب وتمرير افكار ومعتقدات معينة'.

واختتم كلامه: 'على مستوى الجرافيك والتقنيات والمزيكا السنة دي من افضل مواسم المسلسل، النجوم الجدد وضيوف الشرف اضافوا كتير وعلى راسهم فتحي عبدالوهاب ودياب وحمزة العيلي، وحمادة من القليلين اللي تحسه ابن ناس وابن حلال وابن اصول .. في حاله لا بيحارب حد ولا عايز ياخد مكان حد ، مركز في شغله وبس وعشان كده ربنا بيكرمه كل سنة اكتر من اللي قبلها'.