بـ ربع مليون جنيه.. هاجر أحمد تستغيث بسبب تلف حقيبتها وتتقدم بشكوى لحماية المستهلك

خرجت الفنانة هاجر أحمد عن صمتها وكشفت عن غضبها ثم تقدمها بشكوى لجهاز حماية المستهلك، بسبب تلف حقيبة باهظة الثمن من ماركة ديور Dior العالمية بإحدى المغاسل.

كتبت هاجر أحمد عبر جروب شكاوى جهاز حماية المستهلك على فيس بوك في منشور لها: «من شهرين ونصف اتصلت بمغسلة لها فروع كتير في القاهرة الجديدة اسألهم إن عندي شنطة غالية نوعها كريستيان ديور باهظة الثمن، وفيها بقعة كدة بالألوان بسيطة بنتي عملاها».

أزمة هاجر أحمد مع مغسلة

وتابعت: «سألتهم هل تقدروا تشيلوا البقعة دي ولا لأ؟ قالولي طبعًا يا فندم، إحنا كل شغلنا شنط ماركات وشنط غالية، للعلم إن سعر الشنطة حاليًا تقريبًا 5000 دولار (أي بما يوازي ربع مليون جنيه)، لأني عارفة إني لأزم أودي الشنطة للمكان بتاعها يظبطوها بس المشكلة أن أقرب مكان لي دبي، وأنا مش مسافرة دبي الفترة دي أبدًا».

واستكملت هاجر أحمد: «بعد ما تواصلت معاهم أكدوا لي أنهم يقدروا ينضفوها بسهولة، وأنهم كمان بيستخدموا نفس المواد اللي الكريستيان ديور بيستخدموها، قُلت أنا هديكم الشنطة وشوفوا هتعرفوا ولا لأ، لو لا ابعتوهالي وأكدت عليهم فوق الـ 50 مرة، قالولي إحنا عندنا فني بيحدد كمان هل يقدر يعمل كده ولا لأ ومش هنجازف يا فندم طبعًا ثم اتصلت بهم قُلت لهم بصيتوا على الشنطة ولا لأ، قالولي طبعًا سهلة جدًا وهتوصل خلال أسبوع متقلقيش».

هاجر أحمد

تلف شنطة هاجر أحمد

وأضافت: «قُلت تمام وأكدت أنها مش بتتغسل بماية ولا بتدخل غسالة، قالولي لا طبعًا لا ماية ولا غسالة لها مواد معينة وسيبتهم خالص وبعتهولي بعد أسبوع، والصدمة كانت اللوجو بتاعها اللي بـ ماء الدهب ممسوح، والشنطة محروقة من جوة والإيد بتاعتها مكسورة، ومتقطعة من الجناب كلها دايبة وكل معالمها راحت».

وكتبت أيضًا: «اتصلت بهم قُلت لهم عايزة صاحب المكان كلمت واحد مش فاكرة اسمه، وقالي أنا شريك في المكان ونعملك اللي إنتي عايزاه، وتحت أمرك وكان محترم أوي أول مكالمة وقالي ابعتيلي الشنطة وبعتله الشنطة اللي حاطنها في كيس بلاستيك، وبعتوهالي تاني وحط فيها كيس منفوخ عشان تسند طولها وبعتلي معاها بوكيه ورد، طبعًا أنا رجعت الورد وشوفت الشنطة، وكلمت الراجل قُلت له عملت إيه قالي رجعتهالك جديدة، قُلتله حضرتك واعي للي بتقوله الشنطة اتحرقت أنتم ضحكتوا عليّ، الشنطة مبقاش لها معالم واللوجو بتاعها اتمسح».

واستكملت الفنانة هاجر أحمد كلامها في المنشور: «يرد يقولي ما هو ده اللي أنتِ هتسامحيني فيها، قُلت له لا طبعًا علي فكرة أنتم سمعتكوا وحشة جدًا، وناس كتيرة عندهم تجارب سيئة معاكم، وعندي سكرين شوت أنكم بوظتوا حاجات كتير جدًا وكلها غالية، لأني سألت عليهم قالي طيب مدام أنتِ عملتي كده، اللي تعرفي تعمليه اعمليه وأخبطي راسك في الحيطة بعدها تقدمت بشكوى لحماية المستهلك، وبالفعل كلموني أخدوا تفاصيل اللي حصل، صور وفيديو وسكرين شوت، لأني كلمت الشخص اللي شريك في المغسلة، على الواتس اب وبعتلي فيديو قبل وبعد، وفيديو لغسيل الشنطة بسلك المواعين في طبق بلاستيك، بعت وأوفيت كل التفاصيل للواقعة».

واختتمت: «محدش أهتم كل أسبوعين يكلموني يقولوا ممكن تقولنا إيه اللي حصل قُلت في حاجة مش مظبوطة أنا كل أسبوعين بحكي وببعت كل حاجة ومحدش بياخد فعل، وفي مرة مكالمة معاهم قالولي هو مش الراجل بعت ورد ليكي، استغربت جدًا وآخر مكالمة مع حماية المستهلك قالولي الفاتورة بتاعة الشنطة اللي هي 250 جنيه هيدوهالك تقريبًا 10 أضعاف وده قانون حماية المستهلك وأما كلمت حماية المستهلك اتحكالي عن مشاكل المغسلة دي وبلاويهم كتير وأنا حليت لهم مشاكل كتير قبل كده، المهم محدش كلمني تاني، فضلت شهرين ونص منتظرة ياخدوا موقف محدش عمل حاجة، عشان كده قررت أكتب عنهم، تجربة سيئة وناس مش صادقة وكذابين وغير أمناء حقيقي اللي مستغني عن حاجته يبعتهالهم».

أزمة هاجر أحمد مع مغسلة

هاجر أحمد