تامر عاشور يفتح النار على عمرو مصطفى: قليت في نظر تلميذك

فتح تامر عاشور النار على الفنان عمرو مصطفى بعد أن اتهمه الثاني بأنه استباح جُمل لحنية لصناع على قيد الحياة.

تامر عاشور يرد على عمرو مصطفى

كتب تامر عاشور عبر حسابه بموقع التواصل الاجتماعي فيسبوك: 'أغنيه 'الرك على النية، الحان عمرو مصطفى وفي اي حفلة ومكان بقول كده والملحن اللي باعهالي المُقتَبِس الحقيقي'.

وتابع: 'عمرو مصطفى مجبش سيرته نهائي مش عارف ازاي مع إنه عارفه من 8 سنين لما قفلنا الموضوع ده أنا وهو، في مكالمتنا مباشرة ، وبعدين انا مالي ده صراع مُبدعين ويقدر ياخد حقه قانوني ويوقفها محدش منعه أنا أداه على كلامه ده غير إن الاستعانة بعمرو مش صعبة واشتغلنا مع بعض أغنية انطق'.

واستكمل تامر عاشور حديثه، وقال: 'كل الحكاية انه معرفش يجاوب على السؤال الصناعه انهارت ازاي وانت عمود من عمدان الصناعه؟ السؤال اللي مش هتلاقي له إجابة مهما توهت الناس اللي كلهم قالولك أنك مجاوبتش بمنتهى الوعي، وأنا الحقيقة كنت مُنتظر اجابتك علشان اقولك الصناعة فيها كام عمود غيرك وكام مُطرب عمل تاريخ وعلامات من غيرك ومنهم انا وكام مُلحن وشاعر وموزع اشترك في نجاح مطربين واعلانات وتترات وكل حاجه حصلت عادي بدونك'.

وواصل حديثه، وقال: 'أني احترمتك أو على حد قولك إن تامر وهو بيكلمني كان واقف كدهو طبعًا احترمك واقدرك انت استاذ كبير بس قليت في نظر تلميذك لما اتكلمت في التلفزيون عن ان فيه حد عموما احترمك وكأنه حدث جلل لأستاذ كبير زيك في النهايه انت مُلحن كبير مقاما وفنا وإضافة لأي مُطرب غيري'.

وأردف تامر عاشور حديثه، وقال: 'هي الظروف حكمت كده ولا تاريخي فيه عمرو والعكس صحيح، ومش هفوت الفُرصة دي إلا وأشكر كل الفنانين الكِبار المصريين المبدعين شعراء ملحنين موزعين اللي اتشرفت بالعمل معاهم على مدار 20 سنة وحطوني في مكانه انا مكنتش احلم بيها وسط الجمهور العربي كله اللي بنحاول نقدمه ابداع حقيقي مهما ذادت بنّا المناواشات الواردة التي لا تتخطى حاجز الأدب والصداقه والمحبه والود ولمصلحة نجاحنا واستمراريته بفضل الله ثُم فضلكم'.

ووجه الشكر للفرقة الموسيقية، وقال: 'اشكر اعظم فرقه موسيقيه بشتغل معاها جوه وبره مصر اللي بيخلوني قادر على التصدير الدائم والمختلف ' للفن المصري الرائع بحضوري كفرد من تلاميذ لأساتذه كبار حقيقيين، اشكر مصر حبيبتي فعلا بدون إدّعاء ولا مُذايده ولا حتى اغاني جمهورها اللي على كل الاذواق اللي بيسمعوا كل حاجه وكل لون وكل خَبط ورزع وفي الآخر ياخدوا الحلو ويعيش معاهم ويصدروه، ويرموا الوحش وباب النجاح لأي فنان عربي ، اشكر بلدي السعودية وجمهورها اللي ضاف لتاريخي واسمي وتشكيل كيان محترم لحفلات عالميه حرفيا ومش من مره واحده بدأت هناك خطوات ومجهود وتعب ومُسانده وهكذا، إلى أن تمت النجاحات الكبيره الحمد لله ومنها الى كل الدول العربيه اللي اعشق جماهيرهم وحبهم للفن المصري عموما الموضوع كبير قوي'.

واختتم حديثه، وقال: 'يا أستاذ عمرو تيجي حضرتك يا استاذ في الآخر تقول عليا اني مثل حي لإستباحه جُمل لحنيه لناس عايشه بالباطل وعايز بعيونك الحلوه دي تشوف خير في الصناعة'.

أزمة عمرو مصطفى مع تامر عاشور

بدأت أزمة الفنان عمرو مصطفى مع الفنان تامر عاشور عقب حديثه في تصريحات تلفزيونية مؤخرًا وقال بها: 'يا تامر فيه أغنية عملتها لمصطفى صندل التركي، انت أخدت اللحن والتوزيع الموسيقي ونزلتها أغنية ليك، وكتبت عليها اسم ملحن تاني، وانت المفروض جوة الصناعة، اللي بينتجوا الأغاني بيسرقوا الأغاني والألحان، هل ده مش معناه إن الصناعة اتدمرت، هل وجود المهرجانات وصورتنا برة مصر واختفاء الناس الكويسة ده يرضيك'.

وتابع 'مش هعتب عليك إنك أخدت الأغنية بس انت مثل من الأمثلة اللي استباحت الجمل اللحنية لأشخاص موجودة وحية، مش هرد أكتر من كده'.

وأضاف: 'خدته بشكل شخصي لإني قابلته قبل كده وقلتله لما تحب تقول حاجة تعالي قولهالي، وعشان أنا عمود من أعمدة الصناعة المفروض يستأذنني في الأغنية اللي اخدها من غير ما يقول اسمي فيها، وكان المفروض يشيلها لما عرف إنها لحني، ملقتش أي احترام للموضوع. أعتقد لازم تراجع نفسك تاني لما أقول الصناعة انهارت، وزي ما انت بتقول أنا عمود من الأعمدة يبقى انهارت فعلا'.