تركي آل الشيخ يدعم الملحن نادر نور بعد شكواه هو وإسلام زكي من قلة العمل

أعرب الملحن نادر نور عن استيائه من قلة الأعمال المعروضة عليه، وانضم لصوته أيضًا الملحن إسلام زكي.

كتب نادر نور في منشور عبر حسابه الرسمي بموقع فيس بوك: «بعتذر لكل الناس اللي بتبعتلي كلمات أغاني من فضلكم متبعتوش تاني.. معنديش مشاريع شغال عليها ولا نجوم بتسمع مني أغاني ولا عندي حاجة أقدر أساعدك بيها لأني ببساطة محتاج اللي يساعدني».

استغاثة نادر نور

وتابع: «وللناس اللي بتتهمني بالكسل والتقصير أنا فعلا بعدت فترة لأسباب شخصية وبحاول أرجع من 3 سنين ومش عارف.. مسيبتش باب مخبطتش عليه.. فقدت التواصل مع الأغلبية العظمى داخل الوسط الغنائي منهم نجوم اشتغلت ونجحت معاهم ومنهم اللي بحاول اشتغل معاه للمرة الأولى».

واستكمل نادر نور: «ومنهم اللي عشرة عمر ومشوارنا بدأناه مع بعض وأحلام حلمناها ونجاحات حققناها سوا واللي بيرد على التليفون مرة مبيردش تاني وبقيت أحس بالرفض وعدم التقبل وأنا مش متعود أزن على حد أو أطلب الحاجة أكتر من مرة بشكل يقلل مني ومن احترامي لنفسي بعد كل اللي قدمته حتى لو كان قليل فهو كبير من وجهة نظري».

دعم تركي آل الشيخ لنادر نور

واختتم: «أخيرًا معنديش مشاكل مع حد ولا بكتب الكلام ده لكسب تعاطف حد وكل الاحترام والتوفيق لزملائي.. أنا مش زعلان من حد.. وأسف على الإطالة».

وحرص المستشار تركي آل الشيخ على دعمه، وأعاد نشر كلامه، معلقًا: «أنت فنان كبير وأحب أشتغل معاك».

استغاثة إسلام زكي من قلة العمل

وعلق أيضًا الملحن إسلام زكي، وكتب في منشور عبر حسابه الرسمي بموقع فيس بوك: «أنا بضم صوتي والله لصوت الملحن الكبير نادر نور، عشان الناس اللي بتبعت لي كلام وعشمها خير.. معظم المطربين، لو مش كلهم، مش بيردوا تمامًا وبيتجاهلوا كل الرسائل والمكالمات».

وأضاف: «وبواجه صعوبة في التواصل معاهم عشان أعرض شغلي عليهم.. عشان الناس اللي بتسألني: أنت مش متواجد ليه؟.. اسألوهم هما مش أنا، عشان غالبًا أنا معنديش أي أعمال السنة دي.. أنا بشتغل وبعمل اللي عليا سواء ملحن أو موزع، والحمدلله معنديش أغنية أخجل منها، وليا رصيد أتشرف بيه أغنية أغنية».

واختتم إسلام زكي: «من أول ما بدأت في 2008.. أنا عمري ما هبطل أعمل الحاجة اللي بحبها وأعمل أغاني حتى لو هفضل أسمعها لوحدي في عربيتي، بكون سعيد وأنا عارف إن ربنا إداني الموهبة دي ولسه عندي كتير حتى لو مظهرش للنور، فأنا راضي جدًا الحمدلله وفي نعمة».