«نيموني في الأرض وخنقوني وقلعوني الحلق اللي هبيعه واتكفن بيه».. بهذه الكلمات المؤثرة روت السيدة فادية بنت كفر الشيخ؛ تفاصيل استغاثتها من أولادها وطردها في الشارع رغم مرضها واتهامها في شرفها أمام الناس.

وقالت فادية: عندي 6 أولاد وكلهم مبسوطين دلوقتي ومعاهم فلوس كتير، ورغم كده كانوا بييجوا يقلبوا البيت اللي كنت ساكنة فيه وبياخدوا الهدوم والفلوس والذهب بتاعي.

وأضافت فادية خلال لقائها مع الإعلامية نهال طايل ببرنامج «تفاصيل» المذاع على قناة صدى البلد 2، أن أولادها أقدموا ذات يوم على تقديم بلاغ ضدها هيا وأختهم السابعة الصغرى، واتهموها بأنها ليست أختهم من نفس الأب، معلقةً: «اتهموني بأنهي أقمت علاقة مع رجل آخر وأنجبت منه أختهم الصغيرة وده مش حقيقي».

وتابعت: الكلام ده كان من 30 يوم فات، وولادي هجموا على البيت فجأة وكسروا الشبابيك والأبواب، ولما دخلوا خنقوني وخدوا كل حاجة وطردوني في الشارع عشان بنتي الصغيرة قاعدة معايا هيا وبناتها الثلاثة بعد ما تطلقت من زوجها، والسبب في كل ده هو وصولهم خبر بإن الوالد كتب شقة من المنزل لأختهم الصغرى.

ضرب وألفاظ بشعة والطرد من المنزل

وبكلمات مؤثرة يصحبها بعض من الدموع قالت السيدة فادية: «ولادي الاتنين الذكور خنقوني وداسوا بالشبشب على وشي، وضربوني بإيديهم على دماغي، ووجهولي أبشع الألفاظ وهددوني بتقديم ضدي قضية زنا في أختهم».

وأكملت: حرموني كمان من معاش زوجي وخدوه مني، وهما مبسوطين ومعاهم فلوس كتير تكفيهم وتعيشهم هما وولاد ولادهم، وفي الآخر اللي أخذته منهم هو الضرب والبهدلة وإني أنام في الشارع ومش عارفة أغير هدومي رغم إني مريضة سكر وبأخذ أنسولين وبحاجة إلى رعاية، معلقةً: «كانوا مستنيين إن أبوهم يموت عشان يورثوه».

وذكرت السيدة فادية في استغاثتها مع الإعلامية نهال طايل: أبوهم كان موصيهم عليا وعلى أختهم الصغيرة قبل مايموت، ولكن هما معملوش بالوصية دي وكانوا جايين يطردوني من البيت واحنا لسه بناخذ العزاء بتاع المرحوم، وطردوني الساعة 1 بالليل، ومن ساعتها وأنا معرفش بنتي الصغيرة اللي كانت قاعدة معايا فين دلوقتي ومعرفش قاعدة فين ولا راحت فين، وخايفة يكونوا عملوا فيها حاجة هيا وعيالها.

واختتمت: كلهم دلوقتي قاعدين في البيت هما وولادهم وأنا مرمية في الشارع على الحال ده بقالي 30 يوم كاملين، ووصلت لحال إني بقيت أدعي عليهم من اللي شوفته منهم، وعاوزة بيتي زي ما كان عشان أنام مرتاحة.