«حسبي الله في اللي أذاني».. سامح صفوت يثير الجدل بتصريحات صادمة بعد أزمته الصحية

تحدث الفنان سامح صفوت عن تطورات حالته الصحية، معربًا عن استيائه بسبب تعرضه للإيذاء.

كتب سامح صفوت في منشور عبر حسابه الشخصي بموقع فيس بوك: «الحمدلله على الشدة اللي عرفت الواحد مين اللي ظهر وقت التعب ومين اختفى.. المرض كان وجع بس نعمة من عند ربنا لازم نشكره عليها وأنه كشف عن الناس الأصيلة اللي دعواتها كانت بتوصل شايلكم في قلبي والله».

وتابع: «ولولا الشدة اللي الواحد مر بيها مكنش هيعرف الفرق بين شخصيات في حياته.. مين الصاحب أو ابن الناس الأصيل الجدع اللي بجد أو حتى معرفتي حديثة العهد به أشكره من كل قلبي.. ومين اللي كان بيني وبينه عيش وملح وعشرة سنين طويلة وماعملش بيها وكان صاحب مصلحة (مع أن الواحد متربي من والده ووالدته رحمهما الله والبيت اللي طالع منه أنه يصون العيش والملح ويراعي العشرة سواء في مجال الحياة الشخصية أو العملية)».

واستكمل سامح صفوت: «ناس كنا فاكرينها قريبين اتبخرت وناس مكناش نتوقعها كانت أول الحاضرين بالسؤال والدعوة والكلمة الطيبة درس والواحد اتعلمه ومش هيتنسي.. الحمدلله عدت على خير وطالع منها متعلم حاجة جديدة على رأي المثل الإنسان طول ما هو عايش بيفضل يتعلم.. واللي متابعيني وجمهوري اللي انتوا بالنسبة لي أهلي وإخواتي وعيلتي الكبيرة بشكركم من كل قلبي وأشكر كل حد كتب لي كلمة ودعوة طيبة من قلبه».

وأضاف: «كمية الدعوات اللي جاتلي وأنا تعبان على صفحاتي وصفحات الغير وعلى كل المواقع فوق الوصف وفيها كمية حب صادق من القلب وكل واحد سأل عني من الوسط الفني والإعلامي والقانوني اللي هو مجال عملي الأساسي بصفتي محامي مستشار قانوني بالنقض.. حسيت إني بتعافى بفضل ربنا وقدرته ثم دعواتكم اللي وصلت وحسيت بيها وكانت سند ودعم وحسيت أن الدنيا لسه بخير وفيها ناس صافية ونقية زيكم».

واختتم سامح صفوت: «ربنا ما يحرمني من محبتكم ويكتب لكم أجر كل دعوة ويحفظكم ويجازيكم كل خير وما يكتب على حد المرض والضيق والشدة.. بس لو جت أعرف إنها هتنضف حياتك.. وحسبي الله ونعم الوكيل وفوضت أمري إليه في كل من أذاني في حياتي وكان السبب فيما جرى.. ياترى حد فيكم مر بشدة في يوم من الأيام عرفته الناس على أصلها؟».