حمزة العيلي: "إكس لارج" خلى ناس تخس.. وأجري وقتها كان 7 آلاف بس

كشف الفنان حمزة العيلي عن كواليس مشاركته في فيلم "إكس لارج" مع النجم أحمد حلمي، مؤكدًا إن الفيلم ترك علامة فارقة في حياة ناس كتير، خاصة اللي بيعانوا من زيادة الوزن.

وقال العلي في تصريحات تلفزيونية: "في ناس كتير قالولي إن الفيلم كان نقطة تحول في حياتهم، وفعلاً خسروا وزن بسببه.. الفيلم ده غيّر ناس."

العيلي اتكلم كمان عن أجره وقت الفيلم وقال بطريقة فيها صراحة وواقعية: "أجري وقتها كان 6 أو 7 آلاف، مش متأكد بالظبط، بس عمومًا إحنا مش بناخد فلوس كتير، إحنا غلابة."

وسخَر من فرق الأجور بين الممثلين والمطربين: "المطربين هما اللي بياخدوا فلوس، أنا لو أعرف فرقة زفة هروح أغني معاهم!"

وعن أعماله الجديدة، أعلن العيلي مشاركته في مسلسل "فهد البطل" المنتظر عرضه في رمضان 2025، واللي بيجمعه من جديد بالفنان أحمد العوضي، وقال: "بحب أحمد العوضي جدًا، واشتغلنا سوا قبل كده في مسلسل (شديد الخطورة)، وكان في بينا كيميا حلوة، وإن شاء الله (فهد البطل) يعجب الناس لأنه مسلسل ملحمي فعلًا."

مسلسل "فهد البطل" بطولة أحمد العوضي، ميرنا نور الدين، لوسي، أحمد عبد العزيز، صفاء الطوخي، حمزة العيلي، وآخرين، وتدور أحداثه في أجواء شعبية مشوّقة.