حنان مطاوع عن تربية ابنتها: ممنوع السوشيال ميديا ولا تعرف الجنة والنار

كشفت الفنانة حنان مطاوع تفاصيل تربيتها لابنتها أماليا، وموقفها من السوشيال ميديا.

قالت حنان مطاوع عبر تصريحات تلفزيونية: «بنتي شبهي وحنونة أوي ورقيقة ربنا يستر عليها في الزمن ده، وعايزة كل حاجة تبقى صح ومنظمة أوي».

وتابعت: «ومفيش سوشيال ميديا أحيانًا تقولي ممكن أبص في موبايلك وأنا جنبها وأقولها ده اسمه فيسبوك وإنستجرام وبيعملوا إيه غير كده لا وربنا يستر وميطلبوش في المدرسة أن نشتغل على الحاجات دي لأن هنضطر ندخل على المنطقة دي أه بقواعد بس هندخل فيها بس أن ده يحصل أنا لاغية الموضوع تمامًا».

واستكملت حنان مطاوع: «ابتديت أعلم أماليا بنتي حفظ القرآن من سن 3 سنين، المعلمة كانت بتشرح لها آية طلبت منها متشرحهاش لأن فيها ترهيب والترهيب محتاج وعي وهي طفلة وعندها خيال مينفعش دلوقتي أجيب سيرة النار وربنا يستحق أنه يتعبد حبًا فيه مش طمعًا في الجنة ولا خوفًا من النار».

وأضافت: «هي عندها 7 سنين ولحد دلوقتي هي متعرفش الجنة والنار».