خايف منه وطلب عدم مشاركته.. أفشة يكشف موقف طريف مع الخطيب

كشف محمد مجدي أفشة، صانع ألعاب النادي الأهلي، عن موقف طريق جمعه، برئيس القلعة الحمراء، محمود الخطيب، عقب تتويج الفرسان الحمر بكأس السوبر المصري بالإمارات.

وقال محمد مجدي أفشة، في قناة الأهلي:" واحنا راجعين من السوبر المصري في الامارات قعدت مع الكابتن محمود الخطيب بقوله خلي بالك انا قربت اعديك ، قالي ليه؟ قولتله انا 45 اسيست وانت 45 .. قالي انت عندك كام بطولة ؟ قولتله 19 بطولة .. فقال لا يا كابتن محمد يا رمضان أفشة ميلعبش تاني".

وتابع :" في 3 شخصيات كانوا قربين مني جداً .. الكابتن إيهاب جلال ربنا يرحمه يارب وهفضل طول عمري فاكرك لان انت من اكتر الشخصيات المحترمة اللي تعاملت معاها.. والكابتن أدهم السلحدار رحمة الله، واحد من الشخصيات الكويسة جداً اللي تدربت معاه في نادي إنبي، وأحمد رفعت الله يرحمه وعاوز اقوله عمري ما هنساك يا عميد هو كان بيحب يتقاله في إنبي "يا عميد".

وأكمل:" متفرجتش على الفيديو بتاع "الخوف مش من اللي جاي.. الخوف من اللي بعد كدا".. انا معرفش طلعت ازاي ولا كنت بفكر في أيه .. ولقطة معلول لما قولتله "انت احسن باك رايت" لحد دلوقتي لما بشوف الحاجات دي بستغرب ، حتى لو انا عفوي مش للدرجة دي".

وأردف:" مبفكرش أبداً اسيب النادي الأهلي ، ممكن أخرج فترة إعارة لظروف فنية ، انما عمري ما هسيب النادي، وأنا والسولية تخصص ماتشات يوم الجمعة ، لو لعبنا مع بعض يوم جمعة بنسجل".