دمروني وحلمي راح.. صاحبة رقصة التخرج بأسيوط: معملتش حاجة عيب.. فيديو

علقت سمر عنتر خريجة كلية التربية الرياضية بجامعة أسيوط، المعروفة إعلاميا بـ«صاحبة رقصة التخرج»، على تصدرها التريند خلال الفترة الأيام الماضية، مردفة: «أنا مصدومة ومش عارفة إيه حصل لكل دا، ولا أنا رقصت في الساحل ولا فرح ولا علمت حاجة عيب».

وأضافت سمر عنتر خلال مداخلة هاتفية مع الإعلامية نهال طيال، ببرنامج «تفاصيل»، والمذاع على قناة صدى البلد، قائلة: «الموضوع سهل خالص، ولا أنا أول ولا أخر واحدة رقصت في حفلة التخرج، حرام يعني الواحد يفرح، أهلي كلهم كانوا موجودين معايا في حفلة التخرج».

وتابعت سمر عنتر:«زعلت من كلام الناس علشان بيقولوا أني بدور على التريند، وفي حسابات اتعملت باسمي على تيك توك ونشروا الفيديوهات دي، أنا لو بدور على التريند كنت نشرت الفيديو عندي، بعد كلام الناس السلبي قفلت كل حساباتي على مواقع التواصل الاجتماعي».

وأوضحت سمر عنتر، أنها التريند ليس شرطا للنجاح، معقبة:«أنا نفسيتي وحشة جدا علشان الكلام الناس والكلام اللي بيتقال على أهلي، أنا لسه راجعة من المستشفى علشان مدمرة خالص، أنا تعبانة نفسيا ومدمرة».

وأكملت سمر عنتر: «من يوم الواقعة مش بنام وبمر بحالة سيئة بسبب الهجوم، في تحفيل كتير عليا من كل صفحات السوشيال ميديا، في ناس بيتهموني في الشرف والعرض، ورغم كل دا أهلي واقفين جنبي أنا مفضحتش حد».

وأردفت سمر عنتر: «مكنتش عايزة أرقص في الحفلة وكان نفسي افرح أهلي، روحت حفلة التخرج متأخرة، كنت حابة أكون مختلفة يوم التخرج دا زي يوم فرحي، أنا مكملتش في الحفلة غير ساعتين ومشيت، رغم أنه دفعتي كلهم راحوا كملوا الاحتفال، حرام عليكم اللي انتوا بتعملوا فيا دا».