رانيا محمود ياسين: أتغدر بيا من ناس أبويا وقف جمبهم وغاروا مني كتير في جيلي

تحدثت الفنانة رانيا محمود ياسين عن بداياتها الفنية، وعلاقتها بوالدها الفنان الكبير الراحل محمود ياسين.

قالت رانيا محمود ياسين عبر تصريحات تلفزيونية، إن والدها لن يتكرر وكانت علاقته طيبة بكل الوسط الفني، وأشارت إلى أنها متعلقة بأبنائها بشكل كبير حتى أنهم يمثلا لها نقطة ضعف.

تصريحات رانيا محمود ياسين

وتابعت: «حسيت أني اتغدر بيا من ناس وقفت جمبهم وأبويا وقف جمبهم، بيمشوا يتكلموا في البرامج على قد إيه محمود ياسين وقف جمبهم وأنهم عارفين أن رانيا شاطرة جدًا كممثلة ومتميزة فالمفروض يجري عليا أول ما يعمل حاجة ويتقال ده دين ليا لوالدك».

وأضافت رانيا محمود ياسين: «أنت لما بتساعد بتعمل حاجة بتضيفلك، لكن في الآخر بيكون كلام وبس»، لافتة إلى أنها معجبة بأداء الفنانة هنا الزاهد ومسلسلها الأخير إقامة جبرية الذي عُرض قبل شهر رمضان 2025.

أعمال رانيا محمود ياسين

واستكملت: «أنا مبغيرش من حد في الوسط الفني، وأنا بحب هنا الزاهد بتفكرني بيا وأنا ممثلة صغيرة، وعجبني تمثيلها لما عملت إقامة جبرية أنا اتفاجئت بيها.. نفسي أعمل دور كده، واللي غار مني كتير في جيلي وأكبر، كنت بتفاجئ من الغيرة وكنت بتعامل مع الناس كلها ولا ببص على حد ده شكله عامل إزاي ولا أغير منه، مبقلقش من الممثل القوي ببقى عايزة أبقى زيه».

وعلقت رانيا محمود ياسين على تعرض الفنانين باستمرار لانتقادات، قائلة: «الفنان المصري الوحيد اللي مستهدف بالشتيمة على السوشيال ميديا، الدول العربية التانية مبيحصلش كده..طول الوقت إهانات وحسبي الله ونعم الوكيل فيكم، ده لو فنان غلط غلطة بيتشتم أكتر من نتنياهو وترامب، لا بيفكروا أنه ممكن يعيا أو ينام ميقومش أو عنده ولاد أو ميعدوش أنه غلط غلطة أو ذلة».

وفيما يخص رأيها في حرمانية الفن، علقت قائلة: «ماليش دعوة بحرام أو حلال لأن الفن ده بقاله 100 سنة سينما، ولو دخلت شتمتي فنانة يبقى ده رمي محصنات أو قولتي على واحد دياثة ده كده أنت بتهينه قدام أهله».

رانيا محمود ياسين ووالدها

أسرار رانيا محمود ياسين

وردت رانيا محمود ياسين على انتقادات دخولها الفن بالواسطة، معلقة: «مستغلتش محبة والدي وبقيت نجمة زي نجمات جيلي منى زكي وغادة عبدالرازق وغيرهم، لأني اتجوزت بعد فيلم قشر البندق بسنتين، وده اللي عطلني، ومامتي شهيرة خريجة معهد فنون مسرحية وبابا محمود ياسين خريج حقوق مين اللي دخل مين واسطة؟ وهو عرف مامتي قدام كاميرا في مسرحية، وأنا آداب إنجليزي ودارسة أدب ومسرح ومرضيش يدخلي معهد فنون مسرحية، وعمرو أخويا سيناريست».

وعلقت على الشائعات التي لاحقت والدها الفنان محمود ياسين بعد وفاته، وخاصةً شائعة طردها ووالدتها للفنانة نجلاء فتحي من عزائه، قائلة: «دي ناس لذيذة شائعة غريبة اجتهادات مقولناش كده، وده في خيالات الناس اللي حب الثنائي بتاعها مع بابا من كتر ما هو تحفة، وفي صلة قرابة بينها وبين ماما».