رانيا منصور: ماينفعش أمثل مكان أختي.. كل واحدة فينا ليها روح مختلفة

أكدت الفنانة رانيا منصور أن فكرة استخدام شقيقتها التوأم نورهان كبديلة لها في الأعمال الفنية لم تحدث مطلقًا، رغم التشابه الكبير بينهما، قائلة: "ممكن يحصل ده في مشهد مش باين فيه الوش أو من غير كلام، لكن تمثيل بجد؟ صعب جدًا، لأن كل واحدة فينا ليها روح مختلفة".

وأشارت إلى أن الجمهور قد يراهن على التشابه الكبير بينهما، إلا أن الواقع مختلف تمامًا: "رغم الشبه الكبير، لكن الشخصيات مختلفة، والدليل إن عمرو زوج أختي عرفني الأول، وأنا اللي عرفته عليها، لكنه اختار نورهان في النهاية".

وأضافت رانيا أن حتى الصور القديمة بتسبب لها حيرة: "وأنا بتفرج على صورنا وإحنا صغيرين، مش بعرف أميز نفسي من نورهان، الشبه كان قوي جدًا، لدرجة إن كل العيلة كانت بتتلخبط بينا، ماعدا ماما، كانت الوحيدة اللي بتعرف تفرق".