رسالة مؤلمة من والدة أيسل: «لو مش قادرة تربي متخلفيش.. أنتي بتدمري أسر تانية»

وجهت والدة الطفلة أيسل رسالة شديدة اللهجة خلال ظهورها في برنامج تفاصيل المذاع على قناة صدى البلد مع الإعلامية نهال طايل، مؤكدة أن المسؤولية الأساسية لحماية الأطفال تبدأ من الأم داخل المنزل، وليست على عاتق المدرسة أو النادي.

وقالت الأم: 'أنا نشرت بوست أيسل لما لقيت أطفال مدرسة (… ) بيتعرضوا لنفس اللي حصل لبنتي. أنا رحت لمدير المدرسة وقلت له: اعمل سحب ملف للولد اللي قتل بنتي. مقلتلوش أنت عليك ذنب.. أنا بس بطلب إن الولد ده ميرجعش مكان كويس.'

ثم أكدت أن المشكلة الأساسية هي غياب التربية الأسرية: 'أيسل خلاص راحت.. بس في أطفال تانية بتدور على حياة كويسة. يا أم لو مش قادرة تخلفي وتربي.. متخلفيش. أنتي بتدمري أسر تانية.'

وأضافت: 'ابنك لو مربياه صح هييجي يحكيلِك كل التفاصيل، ومش هيلجأ لمواقع إباحية ولا أصحاب سوء. إحنا مش هنقعد نقول أصل المدرسة والنادي.. التربية أساسها في البيت.'

وحول قانون الطفل قالت: 'القانون مش هيتغير.. ده بروتوكول دولي. إحنا 108 مليون، ومش هيغيروا قانون عشان مليون حالة. القوانين دي معمولة لحماية المجتمع كله.'

وعن صبرها بعد رحيل ابنتها: 'بعد أيسل لا بفرح قوي ولا بزعل قوي.. الإحساس وقف. بس أنا راضية. مقتنعة إن ربنا مش بياخد مني حاجة جميلة إلا لو هيعوضني بالأجمل.'

وأكدت أن ابنتها الأخرى تمارا ما زالت تعاني من الفقد: 'بحاول أخرج تمارا من نفسية أختها. أيسل كانت مربية تمارا.'

وختمت بتأكيد ثقتها في العدالة: 'أنا يقيني إن حق أيسل هييجي دنيا وآخرة. وأنا راضية بقضاء ربنا ومديونة للشرطة والنيابة.. لولاهم حق بنتي كان ضاع.'