زوجة إبراهيم شيكا: جوزي اتظلم كتير ..ورئيس نادي الزمالك عمله بلوك

انتقدت هبة التركي، زوجة إبراهيم شيكا لاعب الزمالك السابق، مجلس إدارة القلعة البيضاء برئاسة حسين لبيب، بسبب رفضه مساعدة، زوجها الذي يُعاني من مرض سرطان المستقيم.

وقالت هبة التركي، خلال مداخلة هاتفية مع الإعلامية نهال طايل، مقدمة برنامج «تفاصيل»، عبر قناة «صدى البلد»، 'إبراهيم تعبان لحد دلوقتي ولكن الحمد لله على كل شيء، وهو دايما راضي بقضاء الله ومبيشتكيش غير لما يكون تعبان فعلًا، ولكنه غير قادر على النوم، ولا ينام سوى لمدة ساعتين يوميًا، وأديه 5 أيام لم يأكل بسبب الانسداد الذي حدث له وفقد 7 كيلوجرامات من وزنه خلال 5 أيام'.

وتابعت :' إبراهيم ابن نادي الزمالك وكان من ناشئين النادي، وروحت لحسين لبيب واترجيته إن جوزي بيموت مني وإني لو اشتغلت ليل نهار مش هقدر أوفرله جرعة كيماوي واحدة وقلتله إنه ابنكمـ قالي طب اعملي مسح ذري وكلمينا وبعدها بعتلي ظرف فيه 3000 جنيه'.

وواصلت :' قلتله أنا مش جاية اشحت من النادي ده كان لاعب عندكم وابنكم وليه حق عليكم، وابراهيم دخل بعتله هو وأحمد سليمان وقالهم أنا بموت ومش بنام من الوجع عشان ربنا ساعدوني، راح حسين لبيب عمله بلوك، وكذلك أحمد سليمان، وفيه لاعيبة كانوا زمايله في الزمالك بلكوه ونادي الزمالك معملناش أي حاجة ومن ساعتها بطلت أطلب من أي حد حاجة، وجوزي اتظلم كتير.'.