زيادة سنوية إجبارية ونهاية استمارة 6.. كل ما تريد معرفته عن قانون العمل الجديد

قدمت الهيئة العامة للاستعلامات معلومات وشرح مبسط، عن قانون العمل الجديد في مصر، قائلة: «معمول عشان يخلي العلاقة بين الموظف وصاحب الشغل متوازنة أكتر وحماية أكتر لجميع الاطراف».. إليك أهم نقاطه ببساطة:

️مفيش فصل تعسفي: يعني صاحب الشغل مش هيقدر يمشي الموظف بمزاجه. لازم يكون فيه سبب واضح وده بيتحكم فيه قانوناً، ومش بس كده، "استمارة ٦" اللي كانت بتخوف الناس دي اتلغت.

عقد عمل لكل موظف: أي موظف جديد لازم يكون ليه عقد مكتوب من ٤ نسخ (نسخة ليه، ونسخة للشركة، ونسخة للتأمينات، ونسخة للجهة الحكومية المختصة). ده بيضمن حقوقك كعامل.

️زيادة سنوية إجبارية: القانون بيخلي الشركات ملزمة إنها تزود المرتبات كل سنة بنسبة لا تقل عن ٣٪ من الأجر التأميني. يعني مرتبك هيزيد بشكل إجباري.

️ بالنسبة للموظفات: إجازة الوضع بقت ٤ شهور مدفوعة الأجر كامل، وممكن تاخديها ٣ مرات خلال مدة خدمتك. وكمان لو عندك طفل، ممكن تاخدي إجازة من غير مرتب لمدة سنتين عشان تراعيه.

العمل عن بعد والفريلانس: القانون لأول مرة بينظم أنواع الشغل الجديدة دي زي العمل من البيت (Remote Work) أو الشغل الحر (Freelancing)، عشان يضمن إن اللي بيشتغلوا في المجالات دي ليهم حقوق.

صندوق للعمالة غير المنتظمة: هيتعمل صندوق مخصوص عشان يحمي العمال اللي مش شغالين بعقود ثابتة زي عمال اليومية أو الحرفيين، وده هيوفر لهم شوية حماية اجتماعية.

أمان أكتر: القانون بيمنع التحرش أو التنمر في الشغل، وكمان بيمنع تشغيل الأطفال أقل من ١٥ سنة.

️ الإجازات: ساعات العمل مش هتزيد عن ٤٨ ساعة في الأسبوع، ولو اشتغلت زيادة بتاخد عليها أجر إضافي. كمان إجازة الامتحانات بتتحسب بأجر كامل ومبتتخصمش من رصيد إجازاتك السنوية.

يعني القانون باختصار معمول عشان يخلي سوق الشغل في مصر منظم أكتر، ويحمي العامل ويديله حقوقه من غير ما يضر مصالح صاحب العمل.