«شكرا لنفسي طلعت أقوى».. مي فاروق توجه رسالة مؤثرة في عيد ميلادها وتكشف أمنيتها

تحتفل الفنانة مي فاروق بعيد ميلادها اليوم الثلاثاء 9 سبتمبر الجاري، وحرصت أن توجه رسالة للجمهور ومحبيها ونفسها.

كتبت مي فاروق في منشور عبر حسابها الرسمي بموقع فيس بوك: «النهاردة عيد ميلادي.. ممتنة لكم جدًا لكل الحب اللي شايفاه في بوستاتكم وكلامكم وحبكم اللي دايمًا بيوصلني وأما عني أنا أحب أقول لنفسي».

رسالة مي فاروق في عيد ميلادها

وتابعت: «أنا فخورة جدًا بما أنا عليه الآن وممتنه جدًا لله على كل نعمه من سنين وأنا صغيرة حلمت حلم كبير ومكنتش عارفة مكتوب لي أحققه ولا لا فضلت وراه وبفضل ربنا قدرت أحققه وأحقق أكتر من اللي تخيلت إني أقدر عليه.. فخورة بكوني أم حقيقية لأولاد تشرف واتمنى أكون دايمًا ضهر لهم ومشرفاهم.. فخورة إني زوجة لرجل محترم مش سهل يبقى فيه زيه كتير في زمننا ده».

واستكملت مي فاروق: «فخورة إني قادرة أخرج من حياتي أي حد سام وربنا بيبعده عني.. فخورة إني كنت ابنه بارة لأهل عظماء سابوني وهم راضيين عني ممتنه لله جدًا على كرمه وعوضه ليا دايمًا الجميل في كل حاجة.. شكرًا لله على كل ما أنا عليه الآن وأتمنى أكون دايمًا للأحسن».

تصريحات مي فاروق

وأضافت: «شكرًا لكل اللي قابلوني وحبوني من قلوبهم أنتم كنز حقيقي.. شكرًا أمي وأبويا على رضاكم عني كنت أتمنى وجودكم للأبد عشان تفرحوا بيا بس دايمًا دعواتكم محاوطاني.. شكرًا أخويا ومراته وولاده.. شكرًا ولادي وجوزي وعيلتي الحلوة المحترمة اللي في حياتي».

واختتمت مي فاروق: «شكرًا فريق عملي اللي هم أصبحوا من أفراد عيلتي على حبكم وصدقكم في كل حاجة.. شكرًا أصحابي اللي هم عيلتي على حقيقتكم وحبكم اللي بجد مش تمثيل.. شكرًا من كل قلبي لجمهوري اللي حبني ودعمني واحترمني من ساعة ما ابتديت لحد يومنا هذا شكرًا لكل فرد فيكم.. وفي الآخر شكرًا لنفسي أنها طلعت أقوي بكتير مما تخيلت.. أمنيتي أقدر أكمل المشوار مع ولادي لحد ما يبقوا قد الدنيا كلها وأكون دايمًا حسنة السيرة وطيبة الأثر.. بحبكم قوي قوي قوي».