شوبير ينتقد بيسيرو: لم نرَ حارس ستيلينبوش طوال المباراة

وجّه الإعلامي أحمد شوبير انتقادات لاذعة للبرتغالي جوزيه بيسيرو، المدير الفني لنادي الزمالك، عقب خروج الفريق من ربع نهائي بطولة كأس الكونفدرالية الإفريقية، على يد فريق ستيلينبوش الجنوب إفريقي.

وقال شوبير خلال تصريحاته الإذاعية: "قلت للزمالك من قبل، لازم تخلص المباراة دي بدري، كل ما تسجل هدف مبكر ترتاح، لكن بصراحة أنا ماشوفتش اختبار لحارس مرمى ستيلينبوش طوال الـ90 دقيقة".

وأضاف: "الوحيد اللي عجبني في الزمالك هو عبد الله السعيد، حاجة تحفة وجميلة جدًا، لكن عندي تساؤلات غريبة، ليه محمود بنتايك على الدكة؟ وليه تم تغيير ناصر منسي في الدقيقة 66؟ وكمان إخراج سيف الجزيري؟ كان الأفضل يبقوا سوا لزيادة القوة الهجومية".

وتابع شوبير متعجبًا: "في إيه يا جماعة؟ عمر جابر خرج مصاب، وده ممكن يحصل، لكن التصريحات اللي قالها بيسيرو إن ستيلينبوش دافع فقط وسجل من فرصة وحيدة مش مقنعة. الفريق الجنوب إفريقي عرف ياخد اللي عايزه".

وختم شوبير حديثه قائلًا: "بعد ما سجل ستيلينبوش توقعت الزمالك يكسر الدنيا، لكن العكس حصل. إدارة بيسيرو للمباراة كانت سيئة ولم تعجبني على الإطلاق".