طرد وحرمان.. مأساة جودي وملك مع والدتهما

ماما طردتنا من البيت بعد طلاقها من بابا وحرمتنا من الأكل والشرب، بهذه الكلمات بدأت الشقيقتان جودي وملك مأساتهما مع والدتهما التي انفصلت عن والدهما بسبب كثرة المشاكل .

قالت الفتاتان جودي وملك خلال لقائهما مع الإعلامية نهال طايل، ببرنامج تفاصيل، المذاع على قناة صدى البلد 2: «بعد طلاق بابا شلنا مسؤولية البيت وبنعمل كل حاجة لوحدنا، وإحنا عايشين مع بابا بعد طرد ماما لينا، وشيلنا المسئولية لوحدنا حتى وإحنا عايشين معاها في التجمع الخامس، وبعد الطلاق مكانتش بتتكلم معانا غير في المشاكل بس».

من ناحيتها قالت الفتاتان: «ماما طردتنا علشان زرنا بابا بمعرفتها، وكنا شايلين شغل البيت كله؛ لأنها موظفة وبتشتغل، لكنها بتوفر قبضها لنفسها فقط ومش بتصرف علينا».

وقالت جودي باكية خلال حديثها: كنت محتاجة كتب للدروس، وطلبت من ماما لكنها أحضرت كتابين فقط والباقي أحضرته من مصروفي الخاص، وأي حاجة بنحتاجها بنطلب من بابا.

وبشأن سبب انفصال والدهما، نوهت ملك أن كثرة المشكلات والخناقات بينهما قبل الطلاق، وأن والدتها هي من أصرت على الطلاق من خلال المحكمة، رغم  رفض والدها الطلاق وحل المشكلات من أجلنا، متابعة: من 3 إعدادي وأنا عايشة في الحوارات والمشكلات دي، ومهما نعيط متحسش بينا.