عارفة عبد الرسول تطالب بتغيير نظام أجور العمال في المسلسلات: «بشوف مهازل»

وجهت الفنانة عارفة عبدالرسول نداءً لمديري الإنتاج، عبر حسابها الشخصي بموقع فيس بوك.

وكتبت عارفة عبدالرسول: «من أول ما بدأت طريق الاحتراف وأنا بعمل عقد بيتقسم على عدة دفعات كل فترة أخد دفعة والدفعة الأخيرة بعد عرض العمل الفني..كل الممثلين تأقلموا ونظموا نفسهم على كده».

وتابعت: «العمالة كلها كانت بتقبض باليوم.. يخلص يومه يقبض.. قالك لا انتوا هتقبضوا بالأسبوع.. يبقى الواد شغال يا عيني يوم واحد وأول الأسبوع.. يستنى لما الأسبوع يخلص يوم الخميس ويقبض اليوم بشيك ويستنى ليوم الأحد عشان يصرفه.. العيال يا عيني مش عارفة تمشي حياتها ويستروا نفسهم».

وأضافت عارفة عبدالرسول: «السواق مش عارف يجيب بنزين والمساعد مش عارف يروح للعيال بالأكل.. بشوف مهازل.. بيقعدوا يستلفوا من بعض ولما يقبض يبقى مش عارف يسدد لأنه استلف أكتر من اللي جاى وكمان عامل حسابه أنه هيقعد كام يوم من غير فلوس».

واختتمت: «تسمع بقى خناقات ودوشة وورطات واقعين فيها.. رجاءً للسادة مديري الإنتاج.. رجعوا العيال يقبضوا باليوم كاش زى ما كانوا حفاظًا على ماء الوجه وحفاظًا على ما تبقى من الإنسانية والرحمة».