عصام صاصا: عمري ما كنت شخص مؤذي وقاعد من غير شغل

علق عصام صاصا مؤدي المهرجانات على أزمة حادث السير الذي تعرض له في 6 مايو 2024، مما أدى لدهسه لأحد الأشخاص.

كتب عصام صاصا في منشور عبر حسابه الرسمي بموقع انستجرام: «ربنا وحده يعلم أنا بكتب الكلام دا وأنا عامل إزاى وفيا إيه.. أنا بقالي أكتر من شهر قاعد من غير شغل ومعنديش أي حاجه أعملها غير إني قاعد وما باليد حيلة ومستني قضاء ربنا سبحانه وتعالى ومحدش هيفهم أو هيحس بالموضوع غيري».

تعليق عصام صاصا على الحادث

وتابع: «وأنا مطلعتش اتكلمت وعدت وزدت في الموضوع كتير ومحدش شافني حته بفيديو قولت أي كلمة خالص لكن أنا عندي شغلي وعندي عقود والتزامات لما أعملها وأخلصها يا إما هدخل في قصة تانية أنا مش قدها وشرط جزائي.. أنا هنزل شغلي وهشتغل لأني مش بإيدي أي حاجة غير إني أعمل كده».

واستكمل عصام صاصا: «أنا عندي أمي وعندي أخويا وعندي مراتي وابني وفرقة فيها أكتر من 35 شخص في رقبتي.. أنا شاب لسه ببدأ حياتي ولسه بقول يارب.. مصاريف البيت والأقساط والحاجات دي كلها اللي انتو متعرفوش عنها حاجة مين اللي هيدفعها».

عصام صاصا

تصريحات عصام صاصا

وأضاف: «أنا طالع اتكلم لأن ما باليد حيله غير انكم لازم تفهموا إن كل اللي بتسمعوه مش صح الفلوس والقصور والعربيات كل ده مش صح وحال الناس اللي شاغلين معايا كل دول حالهم واقف بسببي أنا كل دول ليهم بيوت وعيال ودنيا تانية خالص».

وكتب أيضًا: «أنا عارف ومتأكد إن ربنا مش هيورينا الشر ومش هيوريني أي حاجة وحشة ده ابتلاء من عند ربنا سبحانه وتعالى وأنا راضي بكل حاجة ومش هقول غير الحمدلله على كل شئ والحمدلله واللي ربنا كاتبهولي هشوفوا.. سواء خير أو شر محتاج من كل الناس اللي بتحبني تدعيلي من قلبها بجد».

واختتم عصام صاصا: «أنا عمري ما كنت شخص مؤذي وعمري ما كنت شخص وحش مع حد.. ربنا كبير.. وحشتوني أوي يا أحلى جمهور في الدنيا».

عصام صاصا

عصام صاصا