عماد النحاس يروي كواليس حديثه مع حسين الشحات في القمة: "الزمالك هيتشمع النهاردة"

كشف عماد النحاس، المدير الفني السابق للنادي الأهلي، عن كواليس خاصة من مباراة القمة الأخيرة أمام الزمالك، مؤكدًا أن حسين الشحات كان يمتلك ثقة كبيرة قبل اللقاء، ووجّه له رسالة قوية عكست روح اللاعبين الحمراء.

وقال النحاس، في تصريحات إعلامية: "لما جيت أنزل حسين الشحات في ماتش الزمالك، اديته تعليمات فنية معينة، وبعد ما خلصت سألته: عرفت هتعمل إيه يا حسين؟ رد عليّ وقال متقلقش يا كابتن.. الزمالك هيتشمع النهاردة".

وأضاف النحاس: "لقطة وجود كل لاعيبة الأهلي في تلت ملعب الزمالك وخروج الشناوي لنص الملعب؟ ده العادي. طبيعي إن الأهلي يبقى راكب الجيم في ماتشات الأهلي والزمالك، وده اللي اتعودت عليه من وأنا لاعب وحاولت أنقله للعيبة قبل الماتش الأخير".

واختتم النحاس تصريحاته :" أكيد  زعلت لما اتبلغت إني ماشي وهيجي مدير فني أجنبي والزعل ده لأني ماشي من بيتي ولاني شايف إن عندي حاجة أكتر أقدمها لكن في نفس الوقت أنا قابلت الراجل الأجنبي وإتمنيت له التوفيق واتمنى يجيب أكبر عدد من البطولات وكلنا عارفين ان الأهلي دايما بيحتاج مدرب اجنبي ولو الراجل كان اختارني معاه في الجهاز كنت هوافق طبعا.".