عمرو محمود ياسين يطالب بتغيير إدارة الزمالك.. ويؤكد: «اللي حصل مع أحمد زيزو غلط في غلط»

علّق الكاتب والسيناريست عمرو محمود ياسين على هزيمة نادي الزمالك الأخيرة وخروجه من بطولة الكونفدرالية الإفريقية، معبرًا عن استيائه الشديد من الأوضاع داخل النادي، ومطالبًا بتغيير الإدارة لإنقاذ الفريق من الأزمات التي يعاني منها.

وكتب عمرو محمود ياسين عبر حسابه الرسمي على موقع التواصل الاجتماعي فيس بوك، قائلاً: 'يا جماعه صدقوني وباخلاص شديد بقولها نادي الزمالك محتاج إدارة تانية خالص، اللي بتعمله إدارة النادي في جمهوره صعب جدًا وما حدش يقول لي ما لكش دعوة وخليك في نفسك لأن أنا بعتبر نادي الزمالك جزء من تكويني كمواطن مصري وصدقوني أنا دايمًا بيهمني أني أشوف نادي الزمالك قوي'.

وأضاف عمرو محمود ياسين قائلاً: 'أنا مش من الجمهور اللي بيعتبر إن فشل الزمالك وانحداره في المستوى شيء ايجابي أو يسعدني بالعكس هو أصلاً كلما ارتفع مستوى نادي الزمالك ارتفع مستوى النادي الأهلي و ارتفع مستوى كره القدم في مصر، وما تقوليش روح قول للخطيب ولا روح قول للنادي الأهلي هو اللي بيوقعنا؛ لأن باختصار طب وحضرتك فين لو اللي بتقوله ده صحيح أنت كنادي وكمجلس إدارة وكرجال نادي الزمالك أنتم فين من ده؟'.

وتطرق عمرو محمود ياسين للحديث عن أزمة أحمد زيزو، قائلًا: 'كل اللي حصل مع ملف أحمد زيزو غلط في غلط من أول لما فشلوا في بيعه لما جات لهم العروض طمعًا في التجديد له، مرورًا بعدم التجديد له وفشلهم في ده، انتهاءً باستبعاده من خططهم فيما تبقى له من مده في العقد وطبعًا مش هننسى المنظر الساذج العبيط و اللقطة العبثية مع صورة زيزو وهي بتسقط على الأرض وناس غريبة كده فاكرينها صورة طاغية من طواغيت حكم ديكتاتوري مثلا وبيدوسوا عليه كانهم اسقطوا شاوشسكو بجد يا جماعة حرام اللي بيحصل في نادي عظيم وعريق زي ده'.