فاروق فلوكس: الجيل الجديد رافض يشغل القديم ومقدرش أطلع بلطجي زي محمد رمضان

كشف الفنان فاروق فلوكس سبب غيابه عن الساحة الفنية حوالي 5 سنوات، موضحًا أن الجيل الجديد يرفض تشغيل الجيل القديم.

قال فاروق فلوكس عبر تصريحات تلفزيونية: «غيبت 5 سنين عن الفن، ومتعرضش عليّ أدوار خالص طول الفترة دي، وكل الجيل القديم مبيشتغلوش، والجيل الجديد مش عايز الجيل القديم، الجيل الجديد رافض تمامًا الجيل القديم تأليفًا وإخراجًا وتمثيل».

سبب غياب فاروق فلوكس

وتابع: «السبب الثاني في ابتعادي جالي حاجة في عيني خلاني عندي ضعف نظر في القراءة، ومن مشاكلي أني مبعرفش أقرأ قرآن ومبعرفش أمضي، وسجلت كتاب واتفرغ 500 صفحة فيه كل تاريخي.. أما عبد الرحمن أبو زهرة في بيني وبينه خلاف، ولكن هو فنان عن حق مبيشتغلش ليه؟».

واستكمل الفنان فاروق فلوكس حديثه عن الفنان عبد الرحمن أبو زهرة: «كنا بنصور مسلسل في شقة فخمة ولكن الريحة كانت وحشة جدًا وأنا اتكشفت أقول للمخرج نخلص بسرعة علشان التنفس، وعبد الرحمن دخل يقول كلام كتير في المشهد قولتله هي ندوة؟ قالي أه ندوة مش عاجبك أمشي، ودي اللي زعلتني منه أوي».

فاروق فلوكس

فاروق فلوكس ومها أحمد

وتحدث عن تفاصيل إصابته بجلطة في القلب بسبب خلافه مع الفنانة مها أحمد، معلقًا: «جالي جلطة في القلب بسبب مها أحمد كنت شغال معاها في مسلسل، أنا مكنتش عارف أني بشتغل مع مارلين مونرو علشان يحصلي كده في السن ده، هو أنا هروح أعاكسها وهي ترفضني ويجيلي جلطة؟ إيه المنطق الغريب ده؟ المشهد اللي أنا انسحبت علشانه كانت في مكان وأنا في مكان، وربنا يسامحها وأنا مسامحها، وحجة البليد مسح التختة».

وأضاف الفنان فاروق فلوكس: «أنا فعلًا جالي جلطة وعملت عملية في القلب، وهي علقت على جملة أنا بقولها وهو ده الموقف، ودي زي بناتي الصغيريين ومش نجمة كبيرة أوي، وهي سابت التمثيل شوية واشتغلت مذيعة، وبعدين سابت شغل المذيعة، وأنا مقدر ظروفها وظروف ابنها، وربنا يسامحها».

فاروق فلوكس ومها أحمد

فاروق فلوكس ومحمد رمضان

وعلق على تصريحات الفنان محمد رمضان، قائلًا: «محمد رمضان قال مقدرش أعمل دور صبي عالمة، وأنا مقدرش أطلع بلطجي في مسلسل».

واستكمل فاروق فلوكس حديثه عن محمد رمضان: «هو كان عنده كام سنة لما أنا عملت الراقصة والسياسي؟ اشمعنى فاروق فلوكس؟ ما خالد الصاوي وغيره عمل الشخصية دي، وأنا بقى مقدرش أمسك عصاية وأعمل خناقة، مينفعش معايا لا شكلًا ولا موضوعًا، هو له قدرة على كدة ودي حبكة درامية عنده بيحبها، وأنا لا أعيبه ولكن هو يعيب فيا وهو عيل صغير؟، هو ممثل شاطر وله قبول، يخليه بعيد عن الناس القديمة اللي زينا».

فاروق فلوكس ومحمد رمضان