فاروق فلوكس: جالي جلطة في القلب بسبب مها أحمد.. هي مش نجمة كبيرة

تحدث الفنان فاروق فلوكس، عن سبب إصابته بجلطة في القلب مشيرًا إلى أن فنانة شهيرة هي السبب، كما تحدث عن الأخبار التي تداولت حول تأجيله تشييع جنازة والدته بسبب ارتباطه بعرض مسرحية.

فاروق فلوكس وإصابته بجلطة

قال فاروق فلوكس في تصريحات تلفزيونية: 'جالي جلطة في القلب بسبب مها أحمد كنت شغال معاها في مسلسل، أنا مكنتش عارف أني بشتغل مع مارلين مونرو علشان يحصلي كده في السن ده، هو أنا هروح أعاكسها وهي ترفضني ويجيلي جلطة؟ إيه المنطق الغريب ده'.

واستكمل فاروق فلوكس حديثه، وقال: 'المشهد اللي أنا انسحبت بسبب كانت في مكان وأنا في مكان، وربنا يسامحها وأنا مسامحها، وحجة البليد مسح التختة'.

وأضاف: 'أنا فعلًا جالي جلطة وعملت عملية في القلب، وهي علقت على جملة أنا بقولها وهو ده الموقف، ودي زي بناتي الصغيريين ومش نجمة كبيرة أوي، وهي سابت التمثيل شوية واشتغلت مذيعة، وبعدين سابت شغل المذيعة، وأنا مقدر ظروفها وظروف ابنها، وربنا يسامحها'.

فاروق فلوكس ووالدته

أما عن تأجيل فاروق فلوكس دفن والدته بسبب مسرحية، قال: 'أنا مأجلتش دفن والدتي هي اتوفت الساعة 5 وتلت، والدكتور جه وعمل اللازم وكان صعب تدفن الساعة 7'.

وتابع: 'كنت شغال مسرحية وقالولي ممكن نوقف وروحت اشتغلت وكانت من أصعب الليالي في حياتي، وأنا كنت عامل دور ابن أمه، وكانوا بيعلقوا عليا كتير أوي بعد المسرحية ويقولوا سلم على أمك، ويومها محدش منهم قال كلمة على أمي خالص، لأني سايب أمي ميتة في البيت'.

واختتم فاروق فلوكس، حديثه وقال: 'طول عمري في عالم الفن كنت متمني دايمًا أن أي دور أعمله بنجاح، والنحومية مبتجيش كده لازم يكون في حب من الجماهير ونص جيد وتقمص جيد مني، مكنتش عايز أبقى نجم، ولكن الدور اللي أعمله ماحدش يعرف يعمله زيي'.