فتحي عبد الوهاب عن مسلسل الحشاشين: هو مش درس تاريخ.. دراما مستلهمة من أحداث

حرص النجم فتحي عبد الوهاب بالحديث عن مسلسل الحشاشين، الذي يشارك في بطولته بموسم مسلسلات رمضان 2024 الحالي.

فتحي عبد الوهاب يتحدث عن مسلسل الحشاشين

قال فتحي عبد الوهاب في تصريحات تلفزيونية: 'أحيانًا بيحصل خلط، أحداث الحشاشين الدرامية مستوحاة ومستلهمة من التاريخ وهي ليست التاريخ'.

وتابع: 'هي مش درس تاريخ هي دراما مستلهمة من أحداث حصلت فعلا وشخصيات حقيقية وحروب ومجاعات وأشخاص لكن فيها جزء مؤلف ودرامي، ودا مش عذر ولا أي حاجة لأي خطأ قد يكون غير مقصود'.

فتحي عبد الوهاب

وأضاف فتحي عبد الوهاب: 'الفكرة هل السياق وأنا بقرأ الورق اقتنعت بيه وشفت أنه متماسك وأن المشهد دا هيوصل لمشهد تاني ويؤدي في النهاية إلى نهاية الأحداث وبعدها بشوف الشخصية'.

بيتر ميمي يقارن بين الحشاشين وفيلم نابليون

قارن المخرج بيتر ميمي بين مسلسل الحشاشين الذي يقدمه في موسم مسلسلات رمضان 2024، وبعض الأعمال العالمية، وذلك بعد انتقاد البعض له في تقديم أحداث العمل.

كتب المخرج بيتر ميمي عبر حسابه بموقع التواصل الاجتماعي فيسبوك، وقال: 'مبدأيا المسلسل من وحي التاريخ وده مكتوب نصًا فى التترات يعني مش وثيقة تاريخية لكنه دراما تاريخية'.

وتابع: 'هو تارنتينو لما قتل هتلر فى السينما كان حقيقة أو نابليون فى فيلم ريدلى سكوت الأخير هل ده نابليون اللى فى كتب التاريخ، ديه دراما تاريخية'.

وأضاف: 'حاولنا نعمل خيال تصويرى لفترة من الفترات لكن فى شكل درامي، لكن رجعنا فى الديكور والملابس لمراجع كتيرة ونادرة عشان نعمل عالم مشوفنهوش قبل كده وميكنش شبه أفلام أو مسلسلات عالمية'.

واستكمل المخرج بيتر ميمي حديثه، وقال: 'هل ده حسن الصباح، مفيش كتاب اتفق على حسن الصباح لأن المغول حرقوا القلعة وكتبه وأفكاره والمجهود اجتهاد، ماركو بولو أو فلادمير بارتول أو برنارد لويس أو فرهاد دفترى، وكتير جدا، حسن الصباح كان بيعمل معجزات، لا طبعا وده تباعًا مع الحلقات هيتفهم'.

وواصل كلامه على مسلسله الجديد المعروض في موسم مسلسلات رمضان 2024، وقال: 'الحشاشين مسلسل تاريخي بالعامية المصرية، الأحداث بين أتراك وفرس، لما عملوه الأتراك اتكلموا تركي ولما عملوه الأمريكان بيتكلموا إنجليزى، احنا عاملينه فى مصر والترجمة موجودة فى كل بلد، المسلسل بيتعرض فى روسيا وأمريكا وأكتر من بلد كل بلد بلغتها، هم الڤيكنجز كانوا بيتكلموا انجليزى، ولا ويليام والاس كان بيتكلم اللكنة الأمريكية'.

بيتر ميمي يرد على منتقدي مسلسل الحشاشين

أما عن شخصية حسن الصباح، قال المخرج بيتر ميمي: 'ليه حسن الصباح، حسن الصباح شخصية فذة وغريبة ومستفزة أنك تعرف عنها، مش لازم يكون رمز للخير علشان يتعمله مسلسل، هتلر وراسبوتين كانوا فى منتهى الشر لكنهم شخصيات فذة غيرت العالم.. أو على مستوانا المصرى خط الصعيد أو سفاح إسكندرية'.

وأردف: 'أم الخليفة رصد كانت نوبية الأصل، وإسكندرية مدينة فى مصر، لأن فى مدن كتير باسم إسكندرية حوالين العالم، لزم التوضيح للترجمة لأن فيه غير مصريين بيتفرجوا على المسلسل ومجاعة القاهرة الفاطمية مثبوتة تاريخيا، لكن تعددت أشكالها حسب المصادر، وهى على فكرة كانت قبل وصول حسن بفترة مش بعيدة بس ديه دراما (من وحي التاريخ)، ماتسمى بمعجزات حسن الصباح مقصود تتصور بالشكل ده.. وده هيبان تباعا وخصوصا مشهد الراوي حلقة 8، عم ملك شاه اتقتل بوتر القوس لأن ده كان عرف وتقليد، مين الست اللى بتظهر لحسن الصباح؟ ده فى حلقة 30 بقى لو ربنا ادانا عمر'.

واختتم بيتر ميمي: 'كل سنة وأنتم طيبين وسعيد أن المسلسل خلاكم تقروا وتسألوا.. و شوية شوية هتفهموا المسلسل.. صحصحوا معانا كده يا شباب خلونا نعمل شكل جديد.. وتبقى بداية ومع الوقت يتعمل أفضل وأكبر وأحسن من اللى احنا عاملينه.. ومع الوقت ننافس'.

مسلسل الحشاشين

قصة مسلسل الحشاشين

تدور الأحداث في إطار تاريخي، في القرن الـ 11، حيث زعيم الحشاشين الحسن الصباح، وعن قيادته للفرقة التي اشتهرت بتنفيذ عمليات اغتيالات دموية لشخصيات مرموقة في تلك المرحلة.

أبطال مسلسل الحشاشين

ويشارك فتحي عبد الوهاب في بطولة العمل مع عدد من نجوم الفن وهم كريم عبد العزيز، ميرنا نور الدين، أحمد عيد، نيقولا معوض، إسلام جمال، سامي الشيخ، عمر الشناوي، ميمي جمال، نور إيهاب، سوزان نجم الدين، أحمد كشك، نور محمود، ياسر علي ماهر، وآخرين بجانب عدد من ضيوف الشرف.