كريم فهمي يكشف الجندي المجهول في حياته ومفاجأة عن ياسمين عبدالعزيز

تحدث الفنان كريم فهمي عن علاقته القوية بشقيقه الفنان أحمد فهمي، وذكريات الطفولة التي جمعتهما، بجانب علاقته بزوجته دانيا، كما كشف مفاجأة عن الفنانة ياسمين عبدالعزيز.

قال كريم فهمي عبر تصريحات تلفزيونية: «أنا كنت تلميذ مسالم، وكنت أشقى من أحمد بس شقاوته كانت بتعمل بلاوي، ومع كده كنا دايمًا في ظهر بعض، وفيه حكايات كتيرة من الطفولة ماتتحكيش»، لافتًا إلى أنهما لا يزالان يتشاركان الرؤى الفنية، وكان من المفترض أن يجمعهما عمل، لكن لم تتوافق المواعيد.

تصريحات كريم فهمي عن زوجته

وتابع: «الرومانسية في شخصية فارس كانت متوازنة، مكنش ماشي يدلق رومانسية، لأن فيه رجالة بتتفرج كمان، فكان لازم فارس ميبقاش شخصية ملزقة، وأنا متجوز من 12 سنة، وعندي 3 بنات: كاميلا، ناعومي، وجميلة.. ولما اتقدمت لـ دانيا، كنت رومانسي فعلاً، زي فارس أبو العزم اللي مش ملزق، ودانيا قصة مختلفة تمامًا، لو في حاجة أنا وصلت لها دلوقتي فالنجاح ده 90% بيرجع ليها و10% ليا.. دي إنسانة وقفت جنبي وأنا ولا معايا فلوس ولا شقة، ولا عربية، وبنقل من كارير طبيب أسنان لممثل ومؤلف».

واستكمل كريم فهمي: «مين يتحمل ده كله؟ سنة ورا سنة وإحنا مش معانا غير اللي بناكل بيه، ولما كانت بتتعرض عليا أعمال وأرفضها، كانت تقول لي: لو مش حاسس الدور متعملوش، وهي بتحبني كمؤلف أكتر من كممثل، ودانيا بتختار لبسي، وبتقرأ كل أعمالي، هي الجندي المجهول في كل نجاح ليا، واحدة وقفت جنبي وأنا حسابي في البنك صفر ومش بشتغل ومش معايا حاجه ولا شقة ولا عربية وبنقل كاريري من طبيب أسنان لمؤلف وممثل ومن يتحمل ويأمن ليك؟ إلا لو كانت هي واحدة بنت ناس وبتحبك بجد وشايفة أنك هتبقى حاجة؟ ومين ممكن يستحمل لمدة عامين كاملين وإحنا مش معانا جنيه في البنك غير الي بناكل وبنشرب بيهم وبالعافية زاقين».

وفيما يخص الغيرة عليه من المعجبات، علق قائلًا: «أكيد كنا بنغير، هي كانت بتسألني عن مشاهد معينة وهتتصور إزاي، وأنا كمان كنت بغير، بس مع النضج والخبرة الأمور اتغيرت، وكل واحد فينا نضج مع التاني، وفيه حاجات كتيرة بتختلف بداية الزواج عن الفترة اللاحقة مع النضج والحياه والخبرات أنا شخصيًا في بداية الزواج مختلف عن الآن في أول زواجنا لما كان بيجي حد زميلها في المدرسة وأنا معرفوش يسلم عليها كنت بقول قدامه مين ده؟ وكنت بحرجها مع الوقت الموضوع أتغير ونفس الشيء من عندها كانت أول الزواج كانت بتغير جداً وتسالني أنت هتعمل المشهد ده إزاي؟ دلوقتي الأمور اختلفت، كلانا نضج وهي نضجت مع نضوجي في الحياه الزوجية».

تصريحات كريم فهمي عن ياسمين عبدالعزيز

وعن أهم صفات الفنانة ياسمين عبدالعزيز وعن الصداقة الشديدة التي تربطه بها، قال كريم فهمي: «صاحبة صاحبها هي كل حاجة وعكسها طفلة وشخصيتها قوية عنيدة جدًا بس عندها يتحب هي شخصية استثنائية ملهاش نسخة، وطفلة فلازم نعرف أننا بنعامل طفلة في كثير من الأحيان كل شيء وعكسه عيوبها هي مميزاتها ومميزاتها هي عيوبها لازم أكون حكيم معها طول الوقت لأنها طفلة لكن طفلة لذيذة وبشخصية قوية في أوقات ما، وأنا وهي عندنا ADHD، وده بيظهر مثلًا إننا ممكن نكون بنتكلم في حاجة مهمة جدًا وفجأة تلاقيها راحت في موضوع تاني خالص.. لازم ترجّعها تاني للموضوع، ياسمين طفلة فعلًا، وأنا اكتشفت إني عندي ADHD بالصدفة لما بنتي كانت بتعاني من قلة تركيز، رحت أطمن عليها عند دكتورة، فقالتلي: على فكرة حضرتك كمان عندك ADHD».

وأضاف: «لما الدكتورة فاجئتني بالتشخيص رجعت فلاش باك فاكر وأنا صغير كنت قاعد في الفصل والمدرس بيشرح، بحس كأن ستارة نزلت قدامي.. مكنتش بركز، زي جملة هو ذكي لو ركز، التركيز بيكون قوي جدًا في اللي بنحبه بس.. لو حاجة مش حاببها، خلاص تركيزي بيطير، لكن لما أحب حاجة بعملها بأقصى طاقة، وفي الثانوي العام كنت شاطر علشان أدخل طب الأسنان كنت طالب طيب ومسالم جدًا في المدرسة كنت شقي بطيبة».

وقال كريم فهمي أيضًا: «كنت قلقان جدًا من تكرار الثنائية مع ياسمين بعد مسلسل ونحب تاني ليه، لأن الناس بتحب تقارن، بس عوامل كتير أقنعتني، أهمها إن ياسمين عبدالعزيز واحدة من أهم نجمات الوطن العربي، هي مش بس زميلة، هي صديقة قريبة جدًا مني، وشكلت نقطة تحول في حياتي الفنية سواء في 'ونحب تاني ليه؟' أو 'وتقابل حبيب'، وأنا مش هتكلم عن شطارتها في التمثيل، لكن هي كاريزما ماشية على الأرض، شخصيتها عظيمة جدًا، وعلاقتنا زي ناقر ونقير.. مش دايمًا متفقين، بنقفش على بعض ونهزر بعدها، بس في الآخر أصحاب جدًا، ساعات نقفش ومانتكلمش أسبوع، ونتجنب نبص في عنين بعض لأننا هنضحك محدش فاهمنا».