«محدش خان والزواج انتهى من سنتين».. أول رد من محمد مكاوي بعد انتقاد خطوبته من هند مدحت

حرص البلوجر محمد مكاوي على الرد بعد انتقاد خطوبته من المذيعة هند مدحت، واتهامه بالخيانة لأم ابنه البلوجر نورهان عماد.

كتب محمد مكاوي في منشور عبر حسابه الرسمي بموقع فيس بوك: «اتنين عملوا حلال ربنا وقروا فاتحة واتخطبوا وهيتجوزوا إن شاء الله.. واتنين كانوا متجوزين بحلال ربنا وانفصلوا بالحلال من أكثر من سنتين.. محدش خان حد، ومحدش اتظلم، ومفيش "ضحية" في القصة.. زواجي السابق انتهى من أكثر من سنتين، وبعد انتهاء الزواج والانفصال بمدة طويلة، بدأت علاقة جديدة والنهارده الحمدلله فيه خطوبة ونية للزواج إن شاء الله».

وتابع: «خطيبتي الحالية صاحبتي من 11 سنة، ومعرفتهاش عن طريق زوجتي السابقة. إحنا في الأساس كلنا زمايل في نفس مجال الشغل ومعارف من سنين، وده عمره ما كان معناه إن فيه علاقة أو حاجة مستخبية.. وطبيعة شغلنا أصلا فيها سفر و إيفنتات وتصوير وتعامل مع ناس كثير جدا، فمش معنى إن اتنين سافروا في نفس الشغل، أو حضروا إيفنت مع بعض، أو اتصوروا سوا ، إنهم أصحاب مقربين أو إن كان بينهم أي نوع من العلاقات».

واستكمل محمد مكاوي: «مفيش علاقات اتداخلت، ومحدش خان حد ومحدش أخد مكان. ان حد ومش لازم كل قصة انتهت يبقى فيها ضحية وجاني، ومش لازم بداية جديدة تبقى على حساب حد ثاني أو معناها إن فيه حاجة حصلت في الماضي».

وعلق محمد مكاوي على تداول صورة لخطيبته هند مدحت في حفل خطوبته قبل سنوات وذلك قبل ارتدائها الحجاب، قائلاً: «وفي نقطة أهم لما إنسانة تختار إنها تلتزم بأمر ربنا وتتحجب، إيه الهدف إننا نرجع نفتش في صورها القديمة قبل الحجاب وننشرها للناس؟.. إِنَّ الَّذِينَ يُحِبُّونَ أَن تَشِيعَ الْفَاحِشَةُ فِي الَّذِينَ آمَنُوا لَهُمْ عَذَابٌ أَلِيمٌ.. اللي اختار يقرب من ربنا ويتبع أمره، الأولى إننا نعينه ونستره ونحترم اختياره، مش نرجع نطلع له صور من وقت هو اختار إنه يتجاوزه».

واختتم: «وفي الآخر، كل واحد فينا عنده حياة وبيت وأهل ومشاعر والكلمة والصورة اللي بتتنشر ممكن تأذي ناس ملهاش أي ذنب.. فاتقوا ربنا في كلامكم، وفي أعراض الناس، وفي اللي بتنشره إيديكم ومش كل قصة محتاجة ضحية، ومش كل سعادة جديدة لازم ندور وراها على حد نلومه.. واللي بيحبنا وبيتمنالنا الخير ، ادعولنا ربنا يتمملنا على خير، ويبارك لنا في اللي جاي، ويرزق كل واحد فيكم الخير والسعادة وراحة البال».