محمد سامي يرد على تصريحات طارق لطفي: راجع نفسك قبل إلقاء قنابل تزعل زميلك

رد المخرج محمد سامي على تصريحات الفنان طارق لطفي، بعدما قال الأخير إنه اعتذر عن مسلسل كلام مع ورق بسبب دور «شاذ».

كتب محمد سامي في منشور عبر حسابه الشخصي بموقع فيس بوك: «ردًا على كلام طارق لطفي المنتشر اليومين دول.. أولًا طارق ممثل محترم وإنسان جميل واشتغل معايا مرتين، مرة في مسلسل مع سبق الإصرار، ومرة تانية في مسلسل حكاية حياة وأعتقد الدورين كانوا مهمين ومحترمين جدًا وحقق فيهم نجاح مهم».

رد محمد سامي على طارق لطفي

وتابع: «بعدها عرضت عليه دور في مسلسل كلام على ورق، وحصل خلاف إنتاجي على الأجر تقريبًا وعلى مساحة الدور، وعمل الدور ساعتها الراحل الجميل الأستاذ حسين الإمام والكلام ده سنة 2014 يعني من 11 سنة، فوجئت إن طارق لطفي طالع دلوقتي بيقول إنه رفض يقدم الدور لأنه كان دور واحد شاذ جنسيًا».

واستكمل محمد سامي رده على طارق لطفي، قائلًا: «وبدأ يتكلم عن المجتمع والناس وخوفه على الجمهور وكلام غريب جدًا بحالة من المبالغة والاسترسال لكسب ود الجمهور واللعب على الحالة الدينية والمتحفظة عند الجمهور العربي، ولكن فاته حاجة مهمة أنه بيتكلم عن دور في عمل مصور وموجود والناس تقدر تتفرج عليه، والدور مش دور شاذ ولا له علاقة بالشواذ!، مش فاهم طارق قال كده ليه واخترع الموضوع ده إزاي وكمان عمل حكاية غريبة جدًا أنا مش فاهمها، وإنه خاف على عيلته وأسرته وطلعني بروّج لشئ غريب جدًا، أنا أول مرة وسط عرض عمل ليا أسمح لحد ياخدني لموضوع جانبي ولكن كان لازم أرد، لأن لو طارق عنده عيلة فأنا كذلك».

تصريحات محمد سامي

واختتم: «ومع احترامي ليك يا طارق كلامك مختلق وغير صحيح، والدور موجود ينفع الناس تشوفه، وكان حسين الإمام رحمة الله عليه طالع بيحب روجينا، وهي حبيبة عُمره وأنتيمة ماجد المصري وأحمد زاهر وأشرف زكي، وكان جدع مايع وصاحب كباريه وده اللي كان عاجبك في الدور وعملت معايا بروڤة أداء عليه وعلى مياعته وكان عاجبك، راجع نفسك يا صديقي قبل إلقاء قنابل تزعل زميلك منك، ومعلش إني رديت بالشكل ده ولكن لا بد من الرد للتوثيق، كلامك كان لازم يترد عليه وكل سنة وأنت طيب وأسرتك الكريمة بخير ولو أنت ترفض تقديم دور الشاذ فأنا قبلك أرفض أخرجه!».