«مش قادرة أقوم».. يسرا اللوزي تكشف أزمة نفسية أصابتها بسبب «كان ياما كان»

تحدثت الفنانة يسرا اللوزي عن تأثرها نفسيًا، بسبب دورها في مسلسل كان ياما كان.

قالت يسرا اللوزي عبر تصريحات تلفزيونية، إنها عندما قرأت الدور في البداية، استعانت بأولى الحلقات، حيث كانت الشخصية لا تزال تحتاج إلى التعاطف.

وتابعت: «اتعاطفت معاها في البداية، لأن 50% من المتجوزين تلاقي عندهم نفس الإحساس، إنه يبقى في علاقة على الورق كل حاجة تبان مثالية من بره، لكن الواحد من جواه مش مبسوط وكلمة بحبك مكانتش موجودة فى السيناريو، أستاذ ماجد الكدواني هو اللي قرر يقولها وإحنا بنعمل المشهد، فالريأكشن بتاعي اتخضيت بجد، وبعد ما خلصت المشهد ده، عجب أستاذ كريم العدل جدًا، وأستاذ ماجد قاله: أنا كنت حاسس إني عايز أقولها كده في اللحظة دي».

وأشارت يسرا اللوزي إلى أن طبيعة السيدات في سن صغيرة تميل إلى السعى لإرضاء من حولهن، حتى ولو كان ذلك على حساب راحتهن، لذلك عندما تصل المرأة إلى الأربعينيات من عمرها تبدأ في التفكير فيما قدمته لنفسها.

واستكملت: «بتبدأ تقول أنا عملت إيه في حياتي؟ طب كل التضحيات اللي عملتها دي، في حد مقدرها؟ فتبدأ تحس إن حياتها راحت هدر، فأنا عايزة أعيش، ودي فرصتي دلوقتي، فتبدأ تاخد قرارات جذرية، ومن كتر الضغوطات على الستات، ممكن توصل في الأربعينات أو أواخر التلاتينات أنه يكون عندها مرض مناعي، أنا قريت ده فمش متأكدة».

وأضافت يسرا اللوزي: «بعد أي مسلسل بقعد فترة راحة لوحدي، من غير ما أخرج أو أعمل أي حاجة، لكن بعد مسلسل كان يا ما كان جالي حالة غريبة، كنت قاعدة على السرير ومش قادرة أقوم، ولا حتى عارفة أدخل الحمام»، لافتة إلى أنها خضعت لعدد من الفحوصات الطبية للاطمئنان على حالتها الصحية، إلا أن جميع النتائج جاءت سليمة، ولم يتم تشخيص أي سبب عضوي.