مصطفى أبو سريع: أنا أكتر واحد اتسرقت وفيلم مرعي البريمو بيدافع عن نفسه

تحدث الفنان مصطفى أبو سريع عن مشروعه الفني الجديد، وطالب بمنح الفرصة للموهوبين من أبناء جيله.

قال الفنان مصطفى أبو سريع في تصريحات تلفزيونية له: «عندي مشروع مسلسل مش بطولتي لكن بطولة جيلنا، اللي أنا مهتم بحصوله على فرصة للتعبير عن موهبته.. لو جيلنا عبر عن موهبته بإذن الله هنلاقي اختلاف في السينما والتليفزيون، ولازم ندفع بالموهوبين».

تصريحات مصطفى أبو سريع

وأضاف: «لكن عندنا في مصر جملة لسه بدري عليه، لغاية ما ييجي يوم ويقولوا راحت عليه.. المسلسل اسمه سوستة وأني وميشو وكني.. قصة عالمية عن أربعة أصحاب، من إخراج وائل إحسان، وهي في مرحلة البناء.. وعندي مشروع سينما مهم جدًا اسمه فكري لوحده، لكن حابب أبدأ بالتليفزيون».

واستكمل الفنان مصطفى أبو سريع قائلًا: «وأنا أوثق المشاريع هنا في تصريحاتي لأني أكثر واحد اتسرقت».

مصطفى أبو سريع

مصطفى أبو سريع ومحمود حميدة

وتحدث عن علاقته بالفنان محمود حميدة، موضحًا أنها بدأت من مسلسل الأب الروحي، قائلًا: «بنيت مشهد كامل بينه وبيني، وكان أول مشهد ورايح التصوير وأنا منصوب عليا في أول شقة من تحويشة عمري علشان أتجوز، وبعد التصوير الناس سقفت.. أستاذ كبير بتتفرج عليه وتقول ياه لو أشوفه مش أمثل معاه، لكن وقف في وسط اللوكيشن وقال يا جماعة اللي عمل المشهد ده مصطفى أبو سريع، ده حقك ولازم يعرفوا».

وفيما يخص مشاركته في بطولة فيلم بيت الروبي مع الفنان كريم عبد العزيز والمخرج بيتر ميمي، قال: «لما أسمع اسم بيتر ميمي بروح العمل وأنا عارف إني هرتاح، سواء ضيف شرف أو حتى مشهد، وعارف إني هبد.. كريم عبد العزيز اسم غريب بذاكره من زمان وبحبه وفاهمه من غير ما أشوفه».

وقال مصطفى أبو سريع عن كريم عبد العزيز: «واحد بيشتغل وينجح بس ومش شايف تاريخه، ولما تقابله زي ما هو من ساعة فيلم حرامية في كي جي تو، وهو قيمة كبيرة لمصر.. الإنتاج لما كلموني صدرولي إن بيتر ميمي في الإنتاج، قلت لهم مش عايز حاجة ولما أجيلكم نتكلم، لدرجة إني اتفقت على فلوس الفيلم بعد ما خلص العرض الخاص».

مصطفى أبو سريع فيلم مرعي البريمو

كما دافع الفنان مصطفى أبو سريع عن فيلم مرعي البريمو للفنان محمد هنيدي، معلقًا: «في رأيي الحوار عن أي عمل سينمائي ينتهي بالنسبة لصناع العمل والمشاركين فيه بانتهاء التصوير، وأنا اشتغلت واجتهدت في العمل.. في عناصر كثيرة للصناعة، إحنا مش في المسرح وأنا مسؤول عن وجودي أمام الناس بدون مونتاج، ولما حد يستضيفني في برنامج ويطلب مني أتكلم عن الفيلم ده سؤال معرفش أرد عليه».

وتابع: «الفيلم بيدافع عن نفسه، ومش ممكن نخفي النجاح والفشل، وما زال في مرحلة نزول الفيلم في التليفزيون.. الفيلم محقق إيرادات، ومفيش نقد موضوعي، أنا لقيت هجوم بدون داعي وفكرة إن محمد هنيدي ينتج علشان يعمل سينما ده شيء محترم وهو غني عن عمله، وفي حرب مش لطيفة بين المنتجين».

مصطفى أبو سريع