مصطفى بكري عن إعفاء الهواتف المستوردة: المواطن بيتحمل أعباء إضافية

علق الإعلامي مصطفى بكري على قرار دفع رسوم جمركية على التليفونات المحمولة المقبلة من الخارج، معلقا: «الدولة أعلنت أن الهدف من فرض الجمارك هو تنظيم السوق، وإن في ضريبة وجمارك رسمية على التليفونات الجاية من الخارج بتوصل في المتوسط لـ 38.5%، لكنه شدد إن الأرقام على أرض الواقع بتقول غير كده».

وأشار بكري خلال برنامج «حقائق وأسرار» المذاع على قناة «صدى البلد» قائلا: «لو أخذنا مثالا على هاتف آيفون 17 وسعره العالمي حوالي 1200 دولار، يعني قرابة 57 ألف جنيه مصري بسعر الصرف الحالي، فالمفروض حسب الضريبة المعلنة 37.5% إن الجمارك تبقى حوالي 21 ألفا و375 جنيه، وبالتالي السعر بعد الضريبة يوصل لـ 78 ألفا و375 جنيه».

وتابع: «اللي حصل فعليًا إن الضريبة وصلت لحوالي 28 ألفا و24 جنيه، يعني بنتكلم عن ضريبة تقارب 49.16%، وده من خلال تطبيق الحكومة نفسه، يعني تقريبًا نص تمن الموبايل ضريبة».

وأشار مصطفى بكري إلى أن المفاجأة الأكبر إن السعر الرسمي للموبايل في مصر وصل لـ 94 ألف جنيه، مؤكدًا إن الفرق مش ضريبة وبس، لكن تحميل أعباء إضافية على المواطن من غير تفسير واضح أو معادلة مفهومة.

واختتم بكري: «يعني واحد شغال ليل نهار برا وبيحوّل لبلده بالدولار وبيساند الاقتصاد، لما يحب يجيب تليفون لابنه أو لأسرته نشيله فوق طاقته؟ ولو أسرة راجعة رجوع نهائي ومعاها 5 موبايلات تدفع عليهم 100 ألف جنيه؟».