مصطفى جاد يخرج عن صمته ليبرأ أحمد حلمي: عندي شهادة حق مينفعش أكتمها

خرج الملحن مصطفى جاد عن صمته، ليوضح تفاصيل ما حدث بعد الانتقادات التي تعرض لها الفنان أحمد حلمي بسبب موقف جمعهما أثناء عرض مسرحية بني آدم في السعودية.

ظهر الملحن مصطفى جاد في مقطع فيديو، نشره عبر حسابه الرسمي بموقع انستجرام، وقال: «أنا طالع أتكلم النهاردة عشان سبب واحد فقط لا غير إن أنا عندى شهادة حق واللي اتربيت عليه إن شهادة الحق مينفعش أكتمها ولا أفكر لحظة إذا كنت أقولها ولا لا أو استنى عليها ثانية بس الظروف تحكم».

مصطفى جاد يدافع عن أحمد حلمي

وتابع: «وبجملة سوء النية والاستباحة والاستسهال العنيف عند الناس لمجرد إنه معاه تليفون عليه انترنت، فتقدر تقول رأيك وتقدر تشتم وتستبيح عرضه وشرفه ووطنيته لمجرد إنه اختلف معاك في الرأي، واستنيت الأيام اللي فاتت عشان ميتقالش بيركب تريند أو اسمي يتقال أنا مبحبش كدة واللي بيعملوا كدة».

واستكمل مصطفى جاد: «أنا اسمي مصطفى جاد ملحن ومنتج موسيقي مصري بشتغل ملحن من 2011 واشتغلت مع معظم نجوم الوطن العربي وعندي شركة إنتاج واشتغلت مع أكبر شركات الإنتاج في العالم.. باختصار أنا جاي أتكلم على الهجوم اللى حصل من كام يوم على أحمد حلمى وشخصي أنا كمان جاى اتكلم عشان أرد غيبة الراجل المحترم».

تصريحات الملحن مصطفى جاد

وأضاف: «الموضوع بدأ من إن أنا زوجتى الفنانة كارمن سليمان طلبت منى نفسها تحضر مسرحية بنى آدم بتاعة حلمى ومكسوفة تكلمه واتكلمنا وروحنا المسرحية وحضرناها وحصل الموقف اللي كلكوا شوفتوا جزء منه أو شوفتوا الموضوع بعين اللى بدأ يحرك الموضوع، ولازم نكون متفقين أن من حق أي مصري أو مصرية أنهم يغيروا على بلدهم، ويبقوا يد واحدة، لأننا جميعًا نعشق مصر، ولا يجوز لأحد أن يزايد على وطنية أحد، لازم كلنا يبقى عندنا الغضب الرهيب ده لما يكون فيه سبب واضح.. الموضوع ينهيه كله إن أنا وأحمد حلمي نعرف بعضنا من 5 سنوات، تقابلنا في مكان وبدأنا نتواصل مقدرش نقول إننا صحاب بنشوف بعض كل يوم هو نجم كبير، وأنا أحبه وأحب مزاحه، وهزاره كان يخصني وكان في محله».

وقال مصطفى جاد أيضًا ليدافع عن أحمد حلمي: «الرجل طلع على المسرح واتأخرت المسرحية يومها قليلًا، وكان الجمهور في القاعة منزعج بعض الشيء، ولأن المكان كان مزدحم وصعد بلطافته وذكائه وخبرته ليهدئ الجمهور قليلًا وارتجل، ومن ضمن الارتجال نزل بشخصيته اللي بيجسدها في المسرحية وسط الجمهور، واتكلم مع أكثر من شخص مازحًا إياهم ليقول للجمهور: معلش إننا تأخرنا عليكم، نزل بشخصيته الشريرة التي يجسدها في المسرحية، وقال الإفيه اللطيف اللذيذ الذي لا يحمل أي إهانة كما يدّعي البعض، لأن الرجل هو اللي عزمني بنفسه، وأنا عندي القدرة أقفل المسرح لأصحابي وعائلتي وأحجز كل التذاكر بحب الناس وتقديرهم لنا».

واختتم: «اللي عايز أقوله وأكد عليه أنا أعرف حلمي وهو يعرفني بشكل شخصي من 5 سنين ويمكن يعرف كارمن من قبلها لأننا في الآخر زملاء ونتقابل في أماكن كثيرة، واللي مضايقني في الموضوع إن الراجل أما هزر معايا والهزار في حالتي مقبول ولذيذ ودمه خفيف لكن بقينا كل حاجة دلوقتي بعنف.. حلمي صاحبي واللي قاله إفيه، ومشوفتش في حياتي ألطف منه بيقدر الناس ويحترمهم ويحب الهزار والضحك والحياة».

 

View this post on Instagram

 

A post shared by Mostafa Gad (@mostafagadofficial)