مقالب هند رستم.. كيف تعمدت ملكة إغراء السينما المصرية جذب الانتباه؟| فيديو 

تحدث الناقد الفني إلهامي سمير، عن بداية الفنانة هند رستم وكيف تأثرت شخصيتها بسبب قسوة والدها، إلى جانب المقالب التي كانت تفعلها في زميلاتها.

هند رستم وعشق الفن

قال إلهامي سمير خلال لقائه مع الإعلامية نهاد سمير، ببرنامج «صباح البلد» على قناة صدى البلد: «هند رستم حبت الفن من وهي صغيرة وكان بالنسبة ليها وسيلة هروب لأنها اتولدت لأب ضابط من أصول تركية وكان حازما وشديدا ، وأمها كانت ست مصرية أصيلة، وعلشان كده خدت الجمال التركي مع الجمال المصري».

وتابع: «بعد فترة حصل مشاكل بين والدها ووالدتها وانفصلوا وعشان كده بقت عايشة مشتتة بين القاهرة مع الأب وبين اسكندرية شوية مع الأم، وبقت حاسة إنها ضيفة فترة هنا وفترة هنا وعشان كده بقت في الفترة دي إنسانة مشاغبة زي ما كانت بتوصف نفسها».

مقالب هند رستم

وكشف إلهامي المقالب التي كانت تفعلها هند رستم في زميلاتها، قائلا: «كانت بتعمل مقالب في صحابها في المدرسة وعشان كده كانت بتطرد من المدارس وبينقلوها كل شوية لمدرسة جديدة، وكانت بتعمل مشاكل عشان تلفت الانتباه ليها».

واستكمل: «والدتها في الفترة دي بدأت تحس إن المرحلة دي ممكن تاخد هند لسكة تانية، وبقت توديها تتفرج على السينما ولما تروح كانت تقف قدام المرايا تقلد الفنانات وبدأت تقول أنا ليه مبقاش زي دول».

أول فيلم شاركت به هند رستم

وأردف الناقد الفني حديثه، وقال: 'بدأت المدرسة تقوم الشغب اللي عندها في مشاركتها بنشاطات سواء في التمثيل أو الغناء أو الرقص، ووقتها بقت نجمة المدرسة الأولى، ومن هنا بدأت تتعرف على واحدة صاحبتها بتحب السينما أوي وفي مرة كانوا ماشين في الشارع قابلوا نجوى سالم، وقفوها وقالولها إنهم بيحبوا التمثيل وطلبوا منها توديهم عند نجيب الريحاني وقالتلهم بكرة هوديكم، بعدها اتفاجئوا بواحد بيوقفهم بيقولهم شكلكم ينفع تمثلوا، وراحوا الاتنين وتجاهلوا معاد الريحاني'.

واختتم حديثه، وقال: 'بالفعل راحوا عملوا كاستنج في فيلم اسمه أزهار وأشواك وللمفارقة إن صاحبتها متقبلتش وأخدوا هند إنها تقدم دور صغير، ويوم التصوير لما راحت الاستوديو سألت فين الأوضة بتاعتها، قالولها إن الكومبارسات مع بعض وقالولها روحي مع الكومبارسات الأجانب قالتلهم بس أنا مش أجنبية وقفوها مع المصريين، وسألت وقتها إيه الفرق قالولها الأجانب هياخدوا أجر أعلى، وقتها اعترضت وقتها اكتشوا انها مش بنت جاية تلعب وليها شخصية'.