من الذاكرة| أحمد زكي: الغباء سبب فشلي وأدواري بالمسرح هامشية

تحل ذكرى وفاة الفنان أحمد زكي «فتى الشاشة الأسمر» و«الإمبراطور» و«رئيس جمهورية الفنانين»، كما لقبه الجمهور والنقاد، اليوم 27 مارس حيث يمر 19 عامًا على وفاته.

حياة الإمبراطور أحمد زكي مليئة بالأسرار والحكايات والتي كشف بعضها في حوارات ولقاءات نادرة، حيث تحدث عن حياته الشخصية وقال إن غبائه سبب فشله في الحياة.

الحياة الشخصية لأحمد زكي

وتابع في حوار تلفزيوني نادر له، أنه عانى كثيرًا بسبب طبعه وقلة خبرته ونضجه، معلقًا: «اللي حصل بيني وبين هالة فؤاد اسمه غباء الحب، وهو أننا بنحب بعض أوي بس مش عارفين نتفاهم، كنت ساعتها صغير ويتيم وعايز أجيب 6 أولاد، أنا ولد بقى وعايز مراتي تقعد في البيت وتخلف عيال كتير وأمارس دور سي السيد».

واستكمل أحمد زكي حديثه عن حياته مع هالة فؤاد وسبب انفصالهما: «هي حبتني وأنا كمان حبيتها جدًا، بس هي كانت حابة الفن ووافقت إنها تسيبه وحسست نفسها بكده علشاني وأنا صدقت في غمرة الحب، وهي كتمت مشاعرها علشان الارتباط ومصارحتنيش وأنا ما أدركتش ده، وكنت مبسوط جدًا بتنازلها وعملت شرط عليها إنها تسيب الفن وفي نفس الوقت أنا كنت بعمل الحاجة اللي بحبها».

وقال أيضًا: «هي غلطت إنها وافقت وأنا غلطت إني ما ستجبتش لرغبتها وشوفت هي عايزة إيه وقد إيه بتتنازل علشاني.. ولما بيبقى شيء مختفي بين الاتنين، بيحصل قلق، وجه لما حصل هالة ابتدت أنها تفصح عن ده والأسرة اتدخلت، ولما بتاخد جانب من الطرفين بيدمروا العلاقة، وأنا كنت عنيف وهي مكنتش عايزة تعبر وحصلت قفلة أو غباء الحب، وده بيحصل في ناس كتير بتسيب بعض وهما بيحبوا بعض».

واختتم: «خلال 4 سنين انفصال كنا بنحاول نرجع، بس هي ابتدت تشتغل في الفن وبقى أمر واقع وأنا طبعًا اتعصبت وقولت أنها واخدها تحدي معايا وبتعاندني، وأنا ندمت بعدين هي ارتبطت واتجوزت وأنا برضو دخلت في علاقة تانية مع بنت جميلة ورائعة وفشلت بسببي وبسبب غباء الحب».

انفعال أحمد زكي بسبب حياته الشخصية

وانفعل على الإعلامي مفيد فوزي بسبب اقتحامه مناطق خاصة من حياته الشخصية في لقاء تلفزيوني، قائلًا: «في حاجات مينفعش إنت تعرفها ولا حد من المشاهدين يعرفها بين الزوج والزوجة».

وقال أحمد زكي عن علاقته مع هالة فؤاد: «كنت عصبي جدًا وبتعصب على حاجات بسيطة، هي كانت بتستحملني وكنت عارف إنها موجودة جنبي ومش هتسيبني وهتفضل تستحمل عصبيتي لحد ما يوم صحيت ملقيتهاش، لقيت البيت فاضي عليّ».

ابتعاد أحمد زكي عن المسرح

وفيما يخص سبب ابتعاده عن المسرح، أوضح أن دوره كان هامشيًا في مسرحية مدرسة المشاغبين وليس دورًا كبيرًا أو رئيسيًا، معلقًا: «لما كان حد بيتكلم كنت بقف جنبه، سعيد صالح يتكلم بقف جنبه..عادل إمام يتكلم بقف جنبه ودوري فى المسرحية شاب حالم واجتماعيًا فقير، ولو ضحك الناس كنت سأتعرض لانتقاد وإذا بكيت الناس الجمهور سيغضب مني، لذلك حاولت أن يخرج بالشكل الذي ظهر عليه».

وعن قلة مشاركاته في المسرح، قال الفنان أحمد زكي: «أنا خريج مسرح.. وطالع الأول في الدخول وكنت عامل شكسبيريات وموليير وعامل مسرح عربي وجيت أعمل مسرح في مدرسة المشاغبين بس مكنش في أدوار لأنها هامشية».

أحمد زكي في النمر الأسود

أحمد زكي مسلسل الأيام

هالة فؤاد وأحمد زكي

عادل إمام وأحمد زكي