مها أحمد: أنا ست قمر.. ومجدي كامل بيدلعني يا «وزة»

عبرت الفنانة مها أحمد عن حبها الشديد لزوجها الفنان مجدي كامل، مشيرة إلى أنها تزوجته منذ 30 عامًا، وتكن له كل الاحترام والتقدير.

وأضافت مها أحمد خلال تصريحات تليفزوينة، قائلة: «ممكن اكون حسدت نفسي عشان متجوزة راجل زي الفل، دكتور وبقالنا 30 سنة متجوزين، مسبتش البيت مرة، بيعشقني وهو سيدى وتاج راسي وجزمته على دماغي، وانا مبعرفش اتخانق، وساعات اكون متعصبة جدًا عليه لاني عصبية شوية ولما يخرج من الاوضة أقوله مجدي اعملي معاك شاي والموضوع يخلص، وهو استغرب ده في اول الجواز».

وأشارت مها أحمد، قائلة: «مجدي بيحبني عشان حلوة وامورة ومتجددة طول الوقت والكلام ده المفروض تعمله كل الستات، وانا بتشقلب ف البيت، وبيحبني كمان عشان شبه مامته، وست مكافحة وبيدلعني بيقولي يا وزة وحياتنا كلها متخرجش بره ولو هعيش معاه بـ 1000 جنيه أو 10 جنيه هعيش موافقة».

وأوضحت مها أحمد أنها قامت بشراء أجهزة منزلها وقت الزواج بالتقسيط، قائلة: «جبت أجهزة بيتي كلها بالقسط ساعة الجواز، والست متسامحش في الخيانة وأنا عمري ما اتخانت وانا ست كاملة متكاملة وقمر وبحب ادلع واتدلع، ومجدي طول عمرنا أول مايرجع البيت بيناديني يا وزة، وياخدني وأنا قصيرة كده في حضنه ويحط دماغي على صدره».