مي فاروق: طلبت من ربنا ياخد صوتي بسبب الإحباط.. وحفل الرياض أنقذني

تحدثت الفنانة مي فاروق عن التحديات التي واجهتها، موضحة أن حفل روائع الموجي بموسم الرياض وتقديمها أغنية اسأل روحك لكوكب الشرق أم كلثوم، أنقذها وكان نقطة فاصلة في حياتها الفنية.

قالت مي فاروق عبر تصريحات تلفزيونية: «أنا قوية جدًا وده من ربنا مش شطارة مني خالص، وخلال 12 سنة في زواجي الأول كنت بعمل حفلات ولكن بحاول أعافر طول الوقت لأني عايزة أتعرف، وكنت بقول كتير بيني وبين ربنا يا رب لو أنت شايف أن لو هذه الموهبة اختبار ليا فأنا أضعف من أني اختبر».

تصريحات مي فاروق

وتابعت: «لأني مش عارفة أنجح ومش عارفة أتشهر وأنا عندي موهبة زي دي، وكل حاجة حواليا بتمشي تمام وناس معندهاش ربع الموهبة دي وبتنجح وأنا قاعدة مكاني مش عارفة أعمل إيه، وطلبت من ربنا لو أنت شايف كده اسحب الموهبة دي أنا مش عايزة أغني أنا تعبت، كانت فترة صعبة ومحبطة في كل حاجة، ناس قفلت الباب في وشي كتير، واتقالي أنتي بتغني قديم وده مش هينفع وعمرك ما هتنجحي، طب ما أنا بغني قديم علشان معنديش أغاني بتاعتي، عايزة حد يقولي تعالي هنعملك أغاني».

واستكملت مي فاروق: «وفيه ناس قالت لي عمرك ما هتنجحي ولفت الأيام وقالوا كنا بنقول هتبقي أهم واحدة، وغنيت اسأل روحك في حفل روائع الموجي، والحقيقة أني معملتش حاجة وكنت مريضة في الحفلة دي، أول ما نزلت من على المسرح لقيت السوشيال ميديا كلها بتتكلم عليا».

أسرار مي فاروق

وأضافت: «ربنا أراد أنه يشاور عليا في حفل روائع الموجي، طول عمري بغني وبغني لأم كلثوم، ولكن ربنا قرر لي دلوقتي أن تبقى دي النقطة اللي هتوريلي كل الحاجات الحلوة».

وفيما يخص تجربة زواجها الأول الذي استمر 12 عامًا، قالت مي فاروق إنها كانت تجربة مريرة جعلتها تفقد الثقة بنفسها وبمن حولها، مضيفة: «والزواج استمر 12 سنة، والأسود كان كتير فيهم، وكان مفقول عليا طول الفترة دي، ولكن نتج عن أحلى حاجة في حياتي وهما ولادي مالك وزينة».